Դել Բոսկե. Մեսին երբեք չի սխալվում, Ռոնալդուն ունի անհավանական նպատակամղվածություն

Մադրիդի «Ռեալի» եւ Իսպանիայի հավաքականի նախկին գլխավոր մարզիչ Վիսենտե Դել Բոսկեն համեմատել է «Բարսելոնայի» արգենտինացի հարձակվող Լիոնել Մեսիին եւ Թուրինի «Յուվենտուսի» պորտուգալացի հարձակվող Կրիշտիանու Ռոնալդուին:

«Մեսին գործնականում միշտ է գերազանց խաղում: Կան ֆուտբոլիստներ, որոնք երբեք չեն սխալվում: Մեսին նրանցից մեկն է, նա տպավորիչ կայունություն ունի: Մեսիի եւ Ռոնալդուի միջեւ ընտրություն կատարելիս, ես կնշեի Լիոնելին: Նրա խաղի մեջ երեւում է բակային ֆուտբոլից մնացած թեթեւություն:

Թեեւ ընտրում եմ Մեսիին, սակայն պետք է ասել, որ Ռոնալդուն ունի անհավանական նպատակամղվածություն, հիանալի տեխնիկական եւ ֆիզիկական որակներ: Ռոնալդուն իր թիմին միշտ երաշխավորում է մեծ քանակի գոլեր: Առանց նրա «Ռեալի» համար ավելի դժվար է գոլեր խփելը»,- Դել Բոսկեի խոսքը մեջբերում է Mundo Deportivo-ն:

Դել Բոսկեն «Ռեալը» գլխավորել է 1994-ին, 1996-ին, 1999-2003-ին: Նրա ղեկավարությամբ Արքայական թիմը երկու անգամ նվաճել է Իսպանիայի չեմպիոն կոչումը, երկու անգամ էլ հաղթել է Չեմպիոնների լիգայում: Իսպանիայի հավաքականը Դել Բոսկեի հետ դարձել է 2010թ. աշխարհի չեմպիոն, 2012թ. Եվրոպայի չեմպիոն: