Ուկրաինական ԱԹՍ-ները հարձակվել են Թաթարստանի վրա. կա առնվազն 12 զոհ

Օգոստոսի 10-ի առավոտյան Թաթարստանի Նիժնեկամսկ քաղաքը ենթարկվել է անօդաչու թռչող սարքերի զանգվածային հարձակման, որի հետևանքով զոհվել է 12 մարդ, ևս 39-ը ստացել են տարբեր աստիճանի վնասվածքներ։

Հարվածների թիրախում են հայտնվել արդյունաբերական և քաղաքացիական օբյեկտներ: Քաղաքի ղեկավար Ռադմիր Բելյաևը հաստատել է զոհերի փաստը, ինչից հետո Թաթարստանի ղեկավար Ռուստամ Միննիխանովի որոշմամբ հանրապետությունում սուգ է հայտարարվել։ Տուժածներին ցուցաբերվում է անհրաժեշտ բժշկական օգնություն:

Astra-ի կողմից իրականացված ականատեսների լուսանկարների և տեսանյութերի վերլուծության համաձայն՝ անօդաչուների հիմնական թիրախը կարող է դարձած լինել Ռուսաստանի խոշորագույն նավթաքիմիական համալիրներից մեկը՝ «Նիժնեկամսկնեֆտեխիմ»-ը (НКНХ), որը ՍԻԲՈՒՐ-ի Վոլգայի կլաստերի առանցքային ձեռնարկությունն է և սինթետիկ կաուչուկների արտադրության առաջատարը։

Նիժնեկամսկի արդյունաբերական գոտում, որտեղ տեղակայված է նշված գործարանը, գտնվում են նաև «Տատնեֆտ»-ի նավթավերամշակման գործարանը և «ՏԱԻՖ-ՆԿ» նավթավերամշակման համալիրը։ Նշենք, որ այս արդյունաբերական հանգույցը պարբերաբար ենթարկվում է նմանատիպ հարձակումների. ընթացիկ տարվա հունիսին հարվածի էր ենթարկվել նավթավերամշակման գործարանը, հուլիսի սկզբին՝ «ՏԱԻՖ-ՆԿ»-ն, իսկ մարտին իրականացված հարձակման հետևանքով գրանցվել էր մեկ զոհ և շուրջ 50 վիրավոր։