Անգլիայի ֆուտբոլային ասոցիացիան մեղադրանք է ներկայացրել Ժոզե Մոուրինյուին

Անգլիայի ֆուտբոլային ասոցիացիան (FA) մեղադրանք է ներկայացրել «Մանչեսթեր Յունայթեդի» գլխավոր մարզիչ Ժոզե Մոուրինյուին:

 FA-ն ուսումնասիրում է Մոուրինյուի՝ Անգլիայի Պրեմիեր լիգայի 8-րդ տուրի՝ «Նյուքասլի» դեմ խաղի վերջնամասում պահվածքը և կարող է որակազրկել պորտուգալացի մասնագետին:

 Հիշեցնենք, որ «Նյուքասլի» դեմ խաղում «Մանչեսթեր Յունայթեդը» կարողացավ առավելության հասնել 3:2 հաշվով՝ չնայած հանդիպման ընթացքում պարտվում էր 0:2 հաշվով: Խաղի ավարտից հետո Մոուրինյուն պորտուգալերեն հայհոյանքներ հնչեցրեց տեսախցիկների առաջ:

 «Ժոզե Մոուրինյուի՝ խաղից հետո տեսախցիկների առաջ ասած բառերը վիրավորական էին և անվայել: Մինչև հոկտեմբերի 19-ի երեկոյան նա կարող է պատասխանել մեղադրանքին»,- ասված է FA-ի հայտարարությունում: