Ապօրինի պահվող զենք-զինամթերք հանձնելու դեպքեր՝ ոստիկանների բացատրական աշխատանքի արդյունքում

Ոստիկանության տարածքային ստորաբաժանումների ծառայողների բացատրական աշխատանքի շնորհիվ բնակչության կողմից շարունակվում են ապօրինի պահվող զենք-զինամթերքի կամավոր հանձնումները:

Համայնքային ոստիկանության Ամասիայի բաժնի ծառայողների բացատրական աշխատանքի շնորհիվ ոստիկանություն զանգահարած քաղաքացին հայտնել էր, որ Ամասիա-Բանդիվան ճանապարհին գտնվող մատուռի մոտ զենք-զինամթերք է թողել: Համայնքային ոստիկանները նշված վայրում հայտնաբերել են «Մակարով» տեսակի ատրճանակ և տարբեր տրամաչափի փամփուշտներ:

Ապարանի բաժնի համայնքային ոստիկանների բացատրական աշխատանքի շնորհիվ ՆԳՆ 112 Արագածոտնի մարզի բաժանմունք զանգահարած քաղաքացին էլ հայտնել էր, որ զենք-զինամթերք է թողել Ջրամբար գյուղ տանող ճանապարհին գտնվող կիսակառույց շինությունում: Մարզի պարեկներն ու համայնքային ոստիկանները նշված վայրում հայտնաբերել են 3 ատրճանակ, երկփողանի որսորդական հրացան, նռնակներ, նռնակի պայթուցիչներ, տարբեր տրամաչափի 370 փամփուշտ:

Ապօրինի պահվող զենք-զինամթերք հանձնելու դեպք է գրանցվել նաև Համայնքային ոստիկանության Արմավիրի բաժնի ծառայողների բացատրական աշխատանքի արդյունքում:

Ոստիկանություն զանգահարած քաղաքացին հայտնել էր, որ զենք-զինամթերք է թողել Նորավան գյուղի գերեզմանատուն տանող ճանապարհին: Նշված վայրում համայնքային ոստիկանները հայտնաբերել են ինքնաձիգ, 16 մմ տրամաչափի մեկփողանի որսորդական երկու հրացան, տարբեր տեսակի ու տրամաչափի 443 փամփուշտ, ազդանշանային ական, ճայթուցիչներ:
Ոստիկանությունը հորդորում է՝ հետևեք ապօրինի պահվող զենք-զինամթերքը կամավոր հանձնողների օրինակին և կխուսափեք քրեական պատասխանատվությունից: