ՍԴ-ն հլա նոր է ցրցամ տվել

«Հրապարակը» գրում է. Սահմանադրական դատարանն Ազգային ժողովի ընդդիմադիր խմբակցությունների ներկայացրած դիմումը չի ուզում ընդունել վարույթ։ Գրել էինք, որ ԱԺ պատգամավորների ընդհանուր թվի 1/5-ը, այսինքն՝ 33 ընդդիմադիր պատգամավոր դիմում է ներկայացրել Սահմանադրական դատարան՝ Քրեական օրենսգրքում կատարված փոփոխությունները հակասահմանադրական ճանաչելու պահանջով։ Նշենք, որ Քրեական օրենսգրքում կատարված այդ փոփոխություններով գործուն զղջման ինստիտուտը կիրառելի է դառնում ծանր եւ առանձնապես ծանր հանցագործությունների պարագայում, ինչպիսիք են, օրինակ, դասալքությունը, սեռական բնույթի որոշ հանցագործություններ եւ այլն։ Այսինքն՝ եթե անձը ծանր հանցանքը կատարել է առաջին անգամ, ընդունում է մեղքը, ասում է, որ զղջացել է, ապա քննիչը` առանց դատարանի որոշման, կարող է «արդարադատություն իրականացնել» ու անձին պատժից ազատել: Մինչդեռ հայտնի է, որ արդարադատություն իրականացնելու իրավունք ունեն միայն դատարանները։

Հիշեցնենք նաեւ, որ օրենքում այս փոփոխությանը դեմ են եղել մեծ թվով կառույցներ` դատախազությունը, ԱԱԾ-ն, ՄԻՊ-ը եւ այլն, սակայն բարձր իշխանությունը, այնուամենայնիվ ,որոշել է ընդունել այն:

Մեր տեղեկություններով՝ այս գործով ՍԴ դատավոր Երվանդ Խունդկարյանը, ում հանձնարարված է եղել ԱԺ պատգամավորների դիմումի նախնական ուսումնասիրությունը, նամակ է հղել պատգամավոր Արծվիկ Մինասյանին՝ ասելով, որ ՍԴ-ն վստահ չէ, որ դիմումին կից ներկայացված ստորագրությունների ցանկում առկա ստորագրությունները պատգամավորները դրել են հենց այս դիմումի ներքո, եւ առաջարկել է, որ սեղմ ժամկետում Մինասյանը ներկայացնի համապատասխան լիազորագրեր, որոնք կհավաստեն, որ պատգամավորներից յուրաքանչյուրը հենց այս տեքստի` այս դիմումի տակ է ստորագրել։ Այլ կերպ ասած՝ ՍԴ-ն «ձեւ է բռնել», թե իբր հնարավոր է, որ Արծվիկ Մինասյանը հենց այնպես ստորագրություններ է ներկայացրել ՍԴ-ին, իսկ ստորագրողները տեղյակ չեն, թե ինչ դիմումի տակ են ստորագրել։ Որովհետեւ դիմումը մի էջի վրա է եղել, ստորագրությունները` այլ էջի:

Բանն այն է, սակայն, որ ՍԴ-ն նույն ձեւով ներկայացված մեկ այլ դիմում, որը կապված էր ԱԺ կանոնակարգ օրենքում որոշ հոդվածների սահմանադրականության հետ, վարույթ ընդունել էր հենց նման տեսքով: Այն ժամանակ Երվանդ Խունդկարյանի եւ ՍԴ մյուս դատավորների մոտ կասկած չէր առաջացել, իսկ այս դեպքում առաջացել է։ Նշենք նաեւ, որ դիմումը Մինասյանը ՍԴ է հանձնել օգոստոսի 8-ին, իսկ Խունդկարյանը գրությունն ուղարկել է օգոստոսի 31-ին, այսինքն՝ գրեթե 1 ամիս անց, մինչդեռ,  օրենքի համաձայն, եթե դատարանը դիմումի եւ կից փաստաթղթերի վերաբերյալ առարկություններ ունի, անճշտություններ է նկատել, ապա դիմումը մուտքագրելուց հետո եռօրյա ժամկետում պետք է տեղեկացներ դիմումատուին, այլ ոչ թե 22-րդ օրը։ Այսինքն՝ ակնհայտ է դառնում, որ ՍԴ-ն ցանկանում է ամեն կերպ ձգձգել ընդդիմադիրների դիմումների քննությունը` ոչ միայն դրանց քննության փուլում, այլեւ վարույթ ընդունել-չընդունելու հարցում: Դա՝ այն դեպքում, երբ դիմումում միջնորդություն կա հայցի ապահովման միջոց կիրառելու եւ օրենքի գործողությունը մինչեւ ՍԴ որոշումը դադարեցնելու վերաբերյալ։

Հիշեցնենք նաեւ, որ ընդդիմության կողմից սահմանադրական դատարան ներկայացված մեկ այլ դիմում, որը վերաբերում է «Ապօրինի ծագում ունեցող գույքի բռնագանձման մասին» օրենքի սահմանադրականությանը, շուրջ 2 տարի է՝ գտնվում է ՍԴ վարույթում, եւ ՍԴ-ն այդ վարույթի քննությունն անընդհատ կասեցնում է: Այս պահին եւս կասեցված է, քանի որ սահմանադրական դատարանը հարցաշար է ուղարկել Գլխավոր դատախազությանը, մինչ այդ էլ Վենետիկի հանձնաժողովին էր դիմել, եւ քննությունը կվերսկսեն այն ժամանակ, երբ դատախազությունը հարկ համարի այդ հարցերին պատասխանել։ Չի բացառվում, որ դրանից հետո  դիմումի քննությունը մեկ այլ պատրվակով էլ կասեցվի։