Լիբանանում նախագահի միասնական թեկնածու պետք է լինի, որին կհաջողվի երկիրը դուրս հանել ճգնաժամից. Շահան Գանտահարյան
Լիբանանում վերջին շրջանում բանկերի վրա հարձակումների պատճառն այն է, որ մարդիկ չեն կարողանում օգտվել իրենց ավանդներից եւ ստիպված դիմում են ծայրահեղ քայլերի։ Այս մասին այսօր՝ նոյեմբերի 2-ին, NEWS.am-ի հետ զրույցում ասաց Լիբանանում լույս տեսնող «Ազդակ» թերթի գլխավոր խմբագիր Շահան Գանտահարյանը՝ մեկնաբանելով այսօր լիբանանյան բանկերից վրա տեղի ունեցած զինյալ հարձակումը։
«Իմ տեղեկություններով՝ միջադեպից մարդիկ չեն տուժել։ Չի բացառվում, որ առաջիկայում եւս լինեն նման դեպքեր, եւ մարդիկ զինված, երբեմն անզեն, բայց այլ միջոցներով, սպառնան բանկերում։ Պատճառն այն է, որ մարդիկ չեն կարողանում օգտվել իրենց հաշիվներից, իրենց շատ սահմանափակ են տրվում գումարները։ Եթե քաղաքացիները հայտնվում են շատ ծանր վիճակում, երբ շտապ գումար է անհրաժեշտ, օրինակ՝ հիվանդանոցային ծախսերի համար, դիմում են նման ծայրահեղ քայլերի։ Սա հերթական միջադեպն էր, վերջին շրջանում հավանաբար իններորդը»,- ասաց Գանտահարյանը։
Ըստ նրա՝ այս ամենի համար կա նաեւ քաղաքական բացատրություն։ Երկրի նախագահի պաշտոնավարման ժամկետը ավարտվել է շաբաթվա սկզբում, կառավարությունը հրաժարական է տվել, իսկ խորհրդրարանը չի կարողանում նոր նախագահ ընտրել, քանի որ խմբակցությունները չեն կարողանում համաձայնության գալ նախագահի միասնական թեկնածուի շուրջ։
«Առայժմ առաջադրվել է մեկ թեկնածու՝ նախկինում նախագահ ընտրված, բայց պաշտոնը չստանձնած Ռենե Մուավադի որդին։ Նրան առաջադրել են ընդդիմադիր խմբակցությունները եւ նա չունի մեծամասնության աջակցությունը։ Իշխանամետ խմբակցություններն էլ չեն առաջադրում թեկնածու՝ ասելով, որ համախոհական թեկնածու պետք է լինի, որին կհաջողվի երկիրը դուրս հանել ճգնաժամից։ Բացի այդ Լիբանանում միջհամայնքային համակարգ է, համայնքների շուրջ պետք է գոյանա ընդհանուր համախոհություն, որպեսզի ընտրվի նախագահ, հետո նշանակվի վարչապետ, կառավարություն»,- նշեց Գանտահարյանը։
Շահան Գանտահարյանի խոսքով՝ Սահմանադրությունը նախագահ ընտրելու ժամկետներ չի սահմանում, հետեւաբար՝ նոր նախագահ չի կարող ընտրվել, քանի դեռ խորհրդարանական ուժերը համաձայնության չեն եկել։
«Համաձայնությունն էլ կապված է տարածաշրջանում գլխավոր խաղացողների հետ, որովհետեւ համայնքներում գործող հիմնական կուսակցությունները կապված են նաեւ արտաքին կենտրոնների հետ, մասնավորապես՝ Սաուդյան Արաբիա, Իրան, ԱՄՆ։ Լիբանանյան աշխարհագրությունը կուտակել է փորձ նման ճգնաժամերում որոշ առումներով բնականոն կյանքը շարունակելու համար»,- ընդգծեց նա։
Հիշեցնենք, որ նման դեպք գրանցվել էր նաեւ օգոստոսին, երբ Բեյրութում զինված տղամարդը պատանդ էր վերցրել Լիբանանի Դաշնային բանկի հինգ աշխատակցի եւ մեկ հաճախորդի։
Ջրափրկարարները քաղաքացուն անվնաս դուրս են բերել ափ
Հորմուզի նեղուցը չի վերաբացվի, քանի դեռ Վաշինգտոնը չի կատարել Թեհրանի պահանջները
ՀՀ նախկին վարչապետի որդին՝ Արգամ Աբրահամյանը, կալանավորվել է. ՔԿ
Իսրայելը մերժում է Գազայի վերաբերյալ Թրամփի 15 կետանոց ծրագիրը
ՆԳՆ ՓԾ Եղեգնաձորի հրշեջ-փրկարարական ջոկատը կգործի վարչական նորակառույց համալիրում
Գազամատակարարման ընդհատումներ Մասիս քաղաքի մի շարք հասցեներում
Արարատի մարզի քրեական և Վեդիի համայնքային ոստիկանները դանակահարության դեպք են բացահայտել
Հայ շախմատիստները առաջատարների շարքում են
ՀՀ ԶՈՒ հակաօդային պաշտպանության զորքերի զինծառայողների պարապմունքները «Կարիճ» և «Լուսան» զենիթային հ...