Գործադիրը շարունակում է «թաթը» պահել դատական իշխանության վրա և ճնշել դատավորներին
Բուհ չընդունված կամ բարձր բալեր հավաքած, բայց իրենց նախընտրած բուհը, բաժինը չընդունված դիմորդների փաստաբան Ալեքսանդր Կոչուբաևն այսօր լրագրողների հետ զրույցում հայտնեց, որ հուլիսի 29-ին Վարչական դատարան ներկայացրած երկու հայցերից միայն մեկն է վարույթ ընդունվել:
Հիշեցնենք՝ մայիսի 21-ին Կառավարության ընդունած որոշման համաձայն, որն ուժի մեջ էր մտել մայիսի 26-ին, փոխվել էր բուհ ընդունվելու կարգը, ինչի արդյունքում 7.5-8 ստացած դիմորդներն ընդունվել էին, իսկ բարձր միավորներ ստացած մի շարք դիմորդներ՝ դուրս մնացել բուհի այն բաժնից, որի համար առաջին հայտն էին ներկայացրել, քանի որ գերակայությունը տրվել է հենց այդ հայտին: Մյուս հայտերով ընդունվելու հնարավորություն դիմորդը կարող էր ունենալ միայն այն դեպքում, եթե տվյալ բաժինն առաջին հայտով նշած և դրական միավոր հավաքած բոլոր ուսանողներն ընդունվել էին, ու կային թափուր տեղեր:
«Առաջին հայցը, որը վարույթ է ընդունվել, վերաբերում է առհասարակ Կառավարության որոշմանը, որով սահմանվեց ընդունելության նոր կարգ, անվավեր ճանաչելուն: Ի թիվս այլնի, այնտեղ կային իրավական անգրագիտության հետ հատվող խնդիրներ, մասնավորապես, Կառավարությունն ընդունեց նոր որոշում, ուժը չկորցրին նույն ոլորտը կանոնակարգող երկու նախորդ որոշումները: Ուժի մեջ մտնելու կարգը խախտվեց, հետին թվով օրենք ընդունվեց, որ լեգիտիմացնի Կառավարության այս որոշումը, և այլն»,- ասաց Կոչուբաևը:
Մյուս հայցով փաստաբանական թիմը դատարանից պահանջել է, որ անվավեր ճանաչվի Կառավարության նոր որոշման կիրառումը «Պահանջատեր դիմորդ» շարժման անդամներից յուրաքանչյուրի նկատմամբ և կիրառվի նախորդ որոշումը, որը նորի ընդունման ժամանակ դեռ ուժի մեջ էր: Դատարանն արդեն երկու անգամ մերժել է այս հայցը վարույթ ընդունել:
«Առաջին վերադարձի հետ փորձեցինք մի կերպ համակերպվել, հասկանալ, որ դատարանը, իրոք, հայցատեսակի հետ կապված խնդիրներ է տեսել, որը մեր փաստաբանական թիմը չի տեսել, չգնացինք Վերաքննիչ դատարան՝ զուտ խնայելով դիմորդների ժամանակը, որը նրանք այդքան էլ շատ չունեին: Փոփոխեցինք հայցապահանջը: Դատարանը նոր պահանջ դրեց, որն արդեն ծայրահեղ ոչ իրավաչափ է, ավելին, մեզ հիմք է տալիս եզրահանգելու, որ դատարանը գործում է ճնշման տակ: Դատարանը հայցը վարույթ չի ընդունում այն պատճառաբանությամբ, որ անհրաժեշտ է ներկայացնել դիմորդների ներկայացրած, ստորագրած դիմումները: Մենք ունենք հստակ մերժում կրթության պատասխանատուից, ոլորտը համակարգող փոխնախարարից, որ «Պահանջատեր դիմորդ» շաժման մասնակիցների դիմումը մերժվում է: Վարչական դատարանը պահանջ դրեց՝ «տեղեկանք բեր, որ տեղեկանքդ ճիշտ է», պահանջեց դիմորդների դիմումը, ինչն աբսուրդ է: Իրականում չունենք այդ դիմումը, քանի որ դիմորդները հավաքվել են նախարարության առջև, ստորագրել են դիմումը և մուտքագրել ԿԳՄՍՆ»,- ասաց Կոչուբաևը:
Փաստաբանը նշեց, որ այս անգամ արդեն դիմելու են Վերաքննիչ: Կոչուբաևն այս հարցը վարույթ չընդունելու հիմքում ավելի ոչ թե լոկալ, այլ գլոբալ խնդիր է տեսնում:
«Իշխանությունը զգայուն գործերով տրվում է գայթակղությանը և ճնշում է դատարաններին: Վառ ապացույցը հենց այս գործն է, որն իշխանության համար չափազանց զգայուն է, քանի որ այստեղ ի հայտ է գալու Կառավարության թույլ տված անգրագիտությունը: Ցավով պետք է արձանագրեմ, որ գործադիրը շարունակում է թաթը պահել դատական իշխանության վրա և ճնշել դատավորներին»,- ասաց փաստաբանը:
Դիմորդ Հայկ Բաբալյանը հիշեցրեց, որ 10 օր շարունակ դիմորդներն ու իրենց ծնողները պահանջում էին հանդիպում ԿԳՄՍ նախարարի հետ, որը տեղի չի ունեցել:
«ԿԳՄՍ նախարարությունը որդեգրել է մի քաղաքականություն, որի հիմնական դրույթն է արհամարհանքը, հենց պահանջատեր դիմորդների մասով է այդ վերաբերմունքը: Այսօրվա իշխանության հռչակած արժեքներից է ժողովրդավարությունը, Արայիկ Հարությունյանի քայլերը ցույց են տալիս, որ նա այդ արժեքների կրողը չէ: Երբ ծնողները, դիմորդները, հասարակության տարբեր շերտեր՝ ուսանողից մինչև դասախոս, ոլորտի մասնագետներ, պահանջում են հանդիպում այդ մարդու հետ, քննարկելու տարբեր թեմաների շուրջ, և նա արհամարհում է, դա ժողովրդավարությանը չի համապատասխանում: Արայիկ Հարությունյանի պես անձը տեղ չունի այսօր ԿԳՄՍ նախարարի պաշտոնում: Մենք ամեն ինչ անելու ենք, որ նա լքի այդ պաշտոնը»,- ասաց Հայկ Բաբալյանը:
Դիմորդը նաև նշեց, որ «Պահանջատեր դիմորդ» շարժման շարքերը համալրվում են նույնիսկ այնպիսի երիտասարդներով, որոնք այսօր չունեն բուհ ընդունվելու խնդիր: Բաբալյանը պնդեց, որ շարունակելու ենք պայքարը նախարարի հրաժարականի պահանջով:
«Երբ հասարակական տարբեր շերտեր պահանջում են այդ մարդու հրաժարականը, մի օր այդ ալիքը հասնելու է գագաթնակետին, և այլ տարբերակ չի մնալու, քան հրաժարականը»,- ասաց դիմորդը:
Ինչ վերաբերում է ԿԳՄՍ նախարարի այն պնդմանը, որ մի շարք ուսանողների խնդիրը լուծվել է, Բաբալյանն արձագանքեց.
«Կոպիտ ասեմ, դիմորդներին խցկել են տարբեր համալսարաններ, մարդիկ ուզեցել են սովորել այլ տեղում, և իրենց հավաքած բալերը համապատասխանել են, բայց ընդունվել են այլ տեղ: Նրանցից շատերը յուրաքանչյուր պահի պատրաստ են կանգնել մեր կողքին: Այդ մարդկանց հարցը չի լուծվել, նույն կերպ դժգոհ են»:
Դիմորդները պահանջել էին հանդիպում նաև վարչապետ Նիկոլ Փաշինյանի հետ: Հանդիպումների պահանջ այլևս օրակարգում չկա:
«Նիկոլ Փաշինյանից ակնկալիքներ չկան»,- ասաց Հայկ Բաբալյանը: