Սուրիկ Խաչատրյանի (Լիսկա) մերձավորները Գորիսում «դեբոշներ» են սարքում և մնում անպատիժ
Տևական ժամանակ է՝ Սյունիքի նախկին մարզպետ Սուրիկ Խաչատրյանի (Լիսկա) մերձավորները Գորիսում «դեբոշներ» են սարքում և շարունակում մնալ անպատիժ։ Հետաքրքիր է, որ հաշվեհարդար են տեսնում հենց ոստիկանների նկատմամբ։
Ըստ մեր աղբյուրների՝ վերջերս Խաչատրյանի վարորդի որդին իր թայֆայով ներխուժել է ոստիկանության բարձրաստիճան պաշտոնյայի պատկանող սննդի օբյեկտ, բոլորի աչքի առաջ ծեծել մենեջերին և դուրս եկել։ Օրեր անց նույն խմբով օրը ցերեկով ներխուժել են մեկ այլ սննդի օբյեկտ, ծեծել աշխատակցին, ջարդուխուրդ արել ամբողջ գույքը։
Ըստ տարածված խոսակցությունների՝ վերջերս նաև Ս. Խաչատրյանի եղբորորդին է սուպերմարկետներից մեկի դիմաց հայհոյել ոստիկանության համակարգի նախկին պաշտոնյայի՝ հրահրելով վիճաբանություն։
Առաջին հայացքից թվում է, թե ոստիկանության Գորիսի բաժնում րոպե առաջ պետք է նյութեր պատրաստվեին հենց ոստիկանության նկատմամբ բեսպրեդելի առիթով, սակայն, ինչպես երևում է՝ Սուրեն Խաչատրյանի հրոսակախումբը ոչնչի առաջ կանգ չի առնում՝ շարունակելով առաջնորդվել «Մեր դեմ խաղ չկա» կարգախոսով։
Ստեղծված իրավիճակն ու հանգամանքները ցույց են տալիս, որ Ս. Խաչատրյանը դեռևս լավ կապեր ունի Գորիսի ոստիկանության բաժնում, քանի որ, ըստ խոսակցությունների՝ Բուդաղյանի սպանության գործը քննած ոստիկանության շարքային որոշ աշխատակիցներ դեպքից հետո համակարգում բարձր պաշտոններ են ստացել, շարունակում են աշխատել մինչ օրս և որոշակի պարտավորություններ ունեն նախկին մարզպետի նկատմամբ, ուստի Ս. Խաչատրյանին պարտական մնացած համակարգի աշխատակիցները շարունակում են լռել և ծառայություններ մատուցել։