Աա աբսուրդ է, այս պահից M Group ընկերության գործունեությունը դադարեցված է. Ամրամ Մակինյան
Աշխատասենյակներից փաստացի վերցվում է ամեն ինչ, այսինքն՝ այս պահից M Group ընկերության գործունեությունը դադարեցված է։ Այս մասին այսօր՝ օգոստոսի 5-ին, լրագրողների հետ զրույցում ասաց M Group ընկերության փաստաբան Ամրամ Մակինյանը։
«Հակառակ մեր բազմաթիվ խնդրանքների, հորդորների՝ խուզարկությունը շարունակվում է: Ինչո՞ւ եմ բնորոշում խուզարկություն, որովհետեւ ըստ էության՝ սա խուզարկության հատկանիշներ պարունակող գործողություն է: Այո, անունը դրել են զննություն, բայց խուզարկություն է կատարվում։ Զննությանը բնորոշ որեւէ գործողություն չի կատարվում, այսինքն՝ փնտրում են առարկաներ, իրեր, հիմնականում փաստաթղթեր, անգամ առանց նայելու՝ զննության ընթացքում դրանք ուսումնասիրել, հասկանալ, թե ինչ մասին է խոսքը»,- ասաց Մակինյանը։
Փաստաբանը նշեց, որ ինքը տեսանյութ ունի, որտեղ ոստիկանները վերցնում են փաստաթղթերը եւ դնում փաթեթի մեջ. «Այսինքն նրանց դա հետաքրքիր չէ: Սա առեւտրային կազմակերպություն է եւ կան առեւտրային գաղտնիք պարունակող փաստաթղթեր, բանկային գաղտնիք պարունակող տեղեկություններ, աշխատակիցների անձնական նոթատետրեր: Սրանց հասնելու համար քրեական դատավարական օրենսգիրքը կոնկրետ եղանակներ է նախատեսում։ Այստեղ օրենքի հետ բացարձակ կապ չունեցող գործողություններ են տեղի ունենում, սա աբսուրդ է: Աշխատասենյակներից փաստացի վերցվում է ամեն ինչ, այսինքն՝ այս պահից M Group ընկերության գործունեությունը դադարեցված է»։