Միլիցուց ո՞վ ա լավ բան տեսե. Սեյրան Սարոյանը՝ Սասնա ծռերի անդամներին ծեծած ոստիկանների մասին (տեսանյութ)
«Ռուսաստանն իրա պալիտիկան ունի, մենք մեր պալիտիկան: Հիմա ոնց որ ասես՝ մեր բաջանաղը լավ մարդ չի, մենք էլ լավ մարդ չենք»,- սա ՀՀԿ-ական գեներալ-պատգամավոր Սեյրան Սարոյանի մեկնաբանությունն է հարցին, որ Հայաստանի ռազմավարական գործընկեր Ռուսաստանը Ադրբեջանի գործողություներին հստակ արձագանք չի տալիս: Այսօր խորհրդարանում լրագրողները Սեյրան Սարոյանի հետ զրուցում էին սահմանային վերջին սրացումների մասին:
Լրագրողներից մեկի դիտարկմանը, որ Ռուսաստանն իր կամքն է թելադրում Հայաստանին, Սեյրան Սարոյանը հակադարձեց. «Գերտերություն ա, բա ի՞նչ ես ուզում: Ռուսաստանը մենակ մեզի՞ ա թելադրում, միշտ էլ ուժեղի մոտ թույլը մեղավոր չի՞: Հիմա եթե Ռուսաստանի հետ թշնամի դարձանք, մեր վերջն ի՞նչ ա ըլնելու»:
Լրագրողները հետաքրքրվեցին նաեւ «Սասնա ծռերի» դատավարությամբ: «Ոչ թե «Սասնա ծռեր», այլ ՊՊ ծռերն են, գնացին ՊՊԾ-ն գրավին, դարձան ՊՊ ծռերը»,- բնութագրեց Սեյրան Սարոյանը:
Խոսելով ոստիկանների կողմից «Սասնա ծռերի» անդամներին ծեծի ենթարկելու մասին՝ Սեյրան Սարոյանն ասաց. «Մարդ են, կարող ա տփեն էլ իրար: Ոստիկաններն ինչի՞ հմար են, դրանք հո կրթության նախարարությունից չեն: Միլիցուց ո՞վ ա լավ բան տեսե»,- ասաց նա:
Հարցին էլ` Սերժ Սարգսյանը անարդարության դեմ պատերազմ է հայտարարել. ովքե՞ր են Հայաստանում անարդարություն սերմանում, պատգամավորը պատասխանեց. «Դուք, բա ո՞վ: Չեղած տեղից բաներ կմոգոնեք, կխոսաք, էլ գող կատու, էլ քաչալ շուն, սկսում եք տուրուդմփոց, կռիվ, մուտիլովկա: Ես շատ գիտեմ, ես ոնց կարամ ասեմ՝ ով ա անարդար, ով արդար: Դրա համար կան հատուկ պետական կառույցներ, որոնք կպարզեն, թե ով ա անարդար, հերը կանիծեն»:
Դիտարկմանը, փաստորեն, Սերժ Սարգսյանին տասը տարի չի՞ հաջողվել պարզել՝ ով է անարդարության համար մեղավորը, նա պատասխանեց. «Մենք ջահել պետություն ենք, էդ Սերժ Սարգսյանը 10 տարվա մեջ ի՞նչ պտի աներ, կախարդական փայտիկ ունե՞ր, ի՞նչ ուներ էդ խեղճ մարդը: Հետո մեր մենթալիտետից ա գալիս, սաղս մեկը մյուսի վրա շառ ենք անում»:
Սեյրան Սարոյանը համամիտ չէ, որ Սերժ Սարգսյանը թույլ է տվել, որ պաշտոնյաները թալանեն երկիրն ու հարստանան: «Երկրի նախագահը կյանքում թույլ կտա՞ բան գողնան: Պաշտոնյաները բիզնես են անում, հարստանում են, ո՞նց են հարստանում»,-բացատրեց նա:
Նա չի կարծում, որ Սերժ Սարգսյանը պետք է իր տեղը զիջի մեկ ուրիշի, ով կկարողանա բարեփոխումներ իրականացնել. «Մի հատ ցույց տուր կախարդական փայտիկով մարդու, մենք էլ զիջենք: Հենց գտիս բերես, մենք էլ կզիջենք»: Նա չգիտե` 2018 թվականին Սերժ Սարգսյանը լինելո՞ւ է վարչապետ. «Էն վերևի խաղերը որ կան, մենք ըստե խաբար չենք»: