Մենք օպերատիվ ձեւով տնտեսության զարկերակն զգալու խնդիր ունենք. մինչեւ թվերը հասնում են, արդեն դա ուշացած է. Փաշինյան
Երկար ժամանակ ՀՀ քաղաքացիներն իրենց խնայողությունները ներդնելու միայն մեկ տեղ ունեն՝ բանկային համակարգում. բիզնեսն իր հերթին ֆինանսավորման միայն մեկ տեղ ունի՝ բանկային համակարգը: Այս մասին, այսօր՝ հուլիսի 16-ին, կառավարության նիստում հայտարարեց ՀՀ վարչապետ Նիկոլ Փաշինյանը՝ անդրադառնալով Կապիտալի շուկայի զարգացման ծրագրին, որն այսօր հաստատվեց կառավարության նիստում:
«Մենք պետք է հաջորդ փուլ մտնենք, որ քաղաքացիները հնարավորություն ունենան ոչ միայն բանկերում ավանդներ դնել, այլեւ բորսայից գնել ընկերությունների բաժնետոմսեր, անել ներդրումներ: Սա այդ ընկերությունների համար հնարավորություն է նոր ֆիանսական միջոցներ ներգրավել»,-ասաց նա:
Փաշինյանը հավելեց, որ դրա համար նախ պետք է լինեն այն ընկերությունները, որոնք կառաջարկեն իրենց բաժնետոմսերը, իսկ դրա համար պետք է աշխատեն թափանցիկ, ներդրողի համար պետք է պարզ լինի, թե այդ ընկերությունն ինչ բյուջե ունի, ինչպես է աշխատում եւ այլն:
«Հույս ունենք, որ առաջիկա շրջանի այն պրոցեսները, որ մեր տնտեսության մեջ տեղի կունենան, կառավարությունը հավելյալ հնարավորություններ կստանա նպաստելու կապիտալ շուկայի զարգացմանը գործնական, եւ մեր երկրում ի վերջո ֆոնդային բորսան կդառնան ամենաաշխույժ տնտեսական տեղերից մեկը եւ դառնա մեր տնտեսության զարկերակը: Այս մասին կառավարության հերթական նիստին ասաց ՀՀ վարչապետ Նիկոլ Փաշինյանը՝ անդրադառնալով Կապիտալ շուկայի զարգացման ծրագրի հաստատմանը:
«Եկեք խոստովանենք, ինչքան էլ դժվար է դա անելը, որ կառավարությունն ինքը օպերատիվ ձեւով տնտեսության զարկերակն զգալու խնդիր ունի, որովհետեւ մինչեւ վիճակագրությունները ամփոփվում են, արդեն մեկ ամիս անցնում է, եւ այն վստահելի տեղեկությունը, որ մեր սեղանին հայտնվում է, ըստ էության, ուշացած տեղեկություն է»,-ասաց նա:
Վարչապետը նշեց, որ եթե երկրում ռեալ ֆոնդային շուկա ձեւավորվի, կարող ենք համարել, որ տնտեսական հեղափոխության ամենակարեւոր արտահայտությունն է: «Այս ընթացքում հսկայական աշխատանք է տարվել, եւ ես գրեթե համոզված եմ, որ արդյունքներ ունենալու ենք»,-ասաց նա:
Փոխվարչապետ Մհեր Գրիգորյանը եւս անդրադարձավ կապիտալ շուկայի զարգացման ծրագրին եւ նշեց, որ այսօր բիզնես միջավայրը, պոտենցիալ ներդրողները, առանց այս գործիքների, առանց ծրագրի ամփոփման արդյունքում ձեւավորված հարթակների ուղղակի ներդրումներ չեն անում: «Այսօրվա բիզնես միջավայրը այնպես չէ, որ գան տեղում մեծ հետազոտություն անեն, գումար ծախսեն, բոլորը ցանկություն ունեն ներդրում անել, բայց ուզում են գործիքը տեսնել արդի ձեւով»,-ասաց նա եւ նշեց, որ այդ ծրագրի իրականացման արդյունքում նաեւ իրական ներհոսք է լինելու արտաքին աղբյուրներից:
Նշենք, որ կապիտալ շուկայի զարգացման ծրագրի նպատակն է նպաստել Հայաստանում կապիտալ շուկայի զարգացմանը, ներդնել կապիտալ շուկայի այնպիսի գործիքներ, որոնք կապահովեն երկրում ձեւավորված խնայողությունների ներդրումը տնտեսության իրական հատվածում, թույլ կտան բնակչությանը (այդ թվում՝ կենսաթոշակային ֆոնդերի միջոցով) մասնակցել երկրում իրականացվող ներդրումային ծրագրերին եւ ստանալ դրանցից եկամուտներ, որի շնորհիվ կապահովեն նաեւ տնտեսության ֆինանսավորման նոր գործիքների զարգացումը։