Ի՞նչ լիներ, եթե ամեն օր Չինաստանում վարակվեր կես միլիոն, իսկ Իտալիայում 20 հազար մարդ
Ըստ պաշտոնական հաղորդագրության այսօր Հայաստանում կորոնավիրուսով վարակվելու 759 նոր դեպք է գրանցվել: Ընդհանուր առմամբ՝ հունիսի 26-ին հաստատվել է կորոնավիրուսի 23247 դեպք: Ընդհանուր առմամբ, 410 պացիենտ մահացել է (ավելացել է 13-ով):
Սա նույնն է, եթե Չինաստանում մեկ օրում հայտնաբերվեր կես միլիոն նոր դեպք, իսկ Իտալիայում՝ 22 հազար: Ի՞նչ կլիներ Չինաստանում եւ Իտալիայում, եթե նման թվեր արձանագրվեինք: Ի՞նչ կլիներ Գերմանիայում, եթե այնտեղ մեկ օրում վարակվեր 30 հազար մարդ:
Ի՞նչ կլիներ Չինաստանում, եթե այնտեղ համավարակի ընթացքում վարակված լիներ ոչ թե 85 հազար, այլ 16 միլիոն մարդ կամ Իտալիայում՝ 700 հազար: Իսկապես, ի՞նչ կկատարվեր Գերմանիայում, եթե այնտեղ համավարակի ընթացքում վարակվեր 920 հազար մարդ:
Ինչ կլիներ Ռուսաստանում, եթե մեկ օրում ոչ թե հայտնաբերվեր 7 հազար, այլ 50 հազար վարակակիր, իսկ համավարակի ամբողջ ընթացքում վարակված լիներ ոչ թե 621 հազար, այլ 1 միլիոն 600 հազար մարդ:
Պարզ է, որ կառավարություններ ամբողջ կազմով հրաժարական կտային, իհարկե, նախապես ծնկաչոք ներողություն խնդրելով ժողովրդից: Պարզ է, որ առողջապահության նախարարը, ոչ թե ընդդիմության վրա «կայֆեր կբռներ» ֆեյսբուքյան գրառումներով, այլ արդեն հարցաքննվելիս կլիներ:
Պարզապես համեմատության համար եւս մի քանի վիճակագրական թվեր. Իտալիայում համավարակի սկզբից մինչ օրս վարակվել է 240 հազար մարդ: Սա նույնն է, եթե Հայաստանում այսօրվա դրությամբ վարակված լիներ, ոչ թե 23 հազար, այլ 8 հազար մարդ: Իսկ Իտալիան համարվում էր համավարակի կենտրոններից մեկը:
Իսպանիայում վարակվել է 247 հազար մարդ: Իսպանիայում 22 անգամ ավելի շատ մարդ է ապրում, քան Հայաստանում:
Մեղմ ասած, Հայաստանում ծանր իրավիճակ է, բայց վարչախումբը որոշել է այս ամենը ծառայացնել նեղ անձնական խնդիրներ լուծելու համար եւ սահմանադրություն է փոխում, ՍԴ նախագահ փոխում, ընդդիմադիր առաջնորդի զրկում անձեռնմխելիությունից, նոր քրեական գործեր հարուցում:
Հակոբ Ասատրյան
Top-News.am