Քաղաքական իշխանությունը ՀՀ պատմության մեջ թույլ տվեց ամենավտանգավոր արարքը. «Հայրենիք» կուսակցություն
Հայրենիք» կուսակցության խորհուրդը հայտարարություն է տարածել, որում ասվում է.
«Հայրենիք» կուսակցությունը ողջունում է սահմանադրական դատարան դիմելու Ազգային ժողովի «Բարգավաճ Հայաստան» խմբակցության որոշումը։
Մենք արձանագրում ենք, որ քաղաքական իշխանությունը, Նիկոլ Փաշինյանի գլխավորությամբ, այսօր Հայաստանի Հանրապետության պատմության մեջ թույլ տվեց ամենավտանգավոր արարքը, սահմանադրական հեղաշրջում իրագործելով եւ դրանով հիմքեր ստեղծելով իրավական պետության ամբողջական ոչնչացման համար։
Խորհրդարանական մեր մյուս գործընկեր «Լուսավոր Հայաստան» խմբակցությունից ակնկալում ենք, որ կմիանա «Բարգավաճ Հայաստան» խմբակցության նախաձեռնությանը։ Միաժամանակ «Լուսավոր Հայաստան» խմբակցության մեր գործընկերների ուշադրությունն ենք հրավիրում այն հանգամանքին, որ սահմանադրական փոփոխությունների համապատասխանությունը Սահմանադրությանը ստուգելու համար Սահմանադրական դատարան հնարավոր է դիմել ղեկավարվելով Սահմանադրության 169-րդ հոդվածի 1-ին մասի 2-րդ կետով, հիմք ընդունելով ՀՀ Սահմանադրության 168-րդ հոդվածի 1-ին կամ 4-րդ կետերը, որոնք դրա համար ապահովում են լիարժեք եւ սպառիչ հնարավորություններ։ Հույս ենք հայտնում, որ «Լուսավոր Հայաստան» խմբակցությունը կմիանա ՍԴ դիմելու «Բարգավաճ Հայաստան» խմբակցության նախաձեռնությանը, ապահովելով Հայաստանի Հանրապետությունում սահմանադրական կարգի պահպանումը, պաշպանելով հանրության օրինական շահերն ու ժողովրդավարության կարեւորագույն արժեքները»։