Բարձրագույն դատական խորհուրդը չի ծառայում այն նպատակին, ինչի համար ստեղծվել է, և չի պաշտպանում դատավորներին
Բարձրագույն դատական խորհուրդը չի ծառայում այն նպատակին, ինչի համար ստեղծվել է, և չի պաշտպանում դատավորներին: Այս մասին Tert.am-ի հետ զրույցում ասաց ՀՀ մարդու իրավունքների առաջին պաշտպան Լարիսա Ալավերդյանը՝ անդրադառնալով իշխանության կողմից դատավորներին թիրախավորելուն:
«Կասկած չունեմ, որ ԲԴԽ անդամները բարձր մակարդակով տիրապետում են իրավաբանությանը և իրավունքին, բայց այդ քաղաքացիական խիզախության պակասը բերում է նրան, որ զրոյացնում է այդ ունակությունները, և իրենք ամեն անգամ կանգնած են լինում քաղաքական ընտրության առաջ»,- ասաց Լարիսա Ալավերդյանը և նշեց, որ այստեղ դատավորները պետք է իրենց իրավունքները պաշտպանեն ինչպես քաղաքացիները՝ դիմեն դատական ատյաններ և հետո Եվրոպական դատարան:
Ինչ վերաբերում է նախկինի հետ համեմատություններ անցկացնելուն, ապա Լարիսա Ալավերդյանն ասաց, որ նախկինում ևս խնդիրներ եղել են, սակայն մենք պետք է փոխենք երևույթը և ոչ թե մարդկանց: «Մենք առաջին անգամ ենք հանդիպում, որ դատավորների հանդեպ այդքան ցուցադրական ձևով ճնշում է գործադրվում: Այն ինչ առաջ եղել է, դրանք դուրս էր մնում հանրայնացումից, և իշխանությունները հասկանալով հանդերձ, որ դա սխալ է, քողարկում էին ինչ-որ կերպ, իսկ այսօր իշխանությունը չի քողարկում: Կարծես՝ ցուցադրաբար հակադրվում են թե՛ միջազգային նորմերի կարևորագույն սկզբունքներին, թե՛ օրենսդրությանը, թե՛ Սահմանադրությանը»,-ասաց նա:
Ըստ նրա՝ այսօրվա իշխանությունը բարեփոխման անվան տակ իրականցնում է իր իրական նպատակը՝ ունենալ ամբողջովին հնազանդ դատական համակարգ: «Նախկինում ևս եղել են դեպքեր, որ երբ դատավորն իր բարձրունքի վրա էր գտնվում և հետապնդման էր ենթարկվում, իսկ այսօր դատավորներին թիրախվորելը կրում է համակարգային բնույթ: Նախկինում որոշ դատավորներ էին ենթարկվում ճնշումների, իսկ հիմա կարծում եմ, որ իշխանությունը ցանկություն ունի ամբողջովին ունենալ իրենց հլու-հնազանդ դատական համակարգ»,-ասաց նա:
Լարիսա Ալավերդյանը գտնում է, որ այն ինչ կատարվում է Հայաստանում միջազգային պրակտիկայում անվանվում է ընտրովի արդարադատություն, և այդպիսի երևույթները տեղի են ունենում կտրուկ իշխանափոխության, կամ ինչպես համարում են իշխանությունը՝ հեղափոխության դեպքում:
«Ընտրովի արդարադատության դեպքում իրականում անտեսվում, ոտնատակ է տրվում ամենակարևոր սկզբունքը՝ իրավունքի գերակայոթյունը և օրենքի առաջ հավասարությունը: Ընտրովի արդարադառության դեպքում գործըթնացները չեն ծառայում իրավական պետություն կայացնելոն և դա պատահական չէ, քանի որ եթե նայեք 2018թ․ կարգախոսները, այնտեղ չկա իրավական պետություն ասվածը»,-ասաց նա: