Ձախողված վարչախմբի վտանգավոր խաղերը

Ընդամենը երկու տարում բոլոր ոլորտներում, այդ թվում կորոնավիրուսային համավարակի դեմ պայքարի ճակատում ձախողված վարչախումբը, որը նաեւ սկանդալային պատմությունների մեջ է ներքաշված, ինչպես պնդում են լավատեղյակ աղբյուրները, որոշել է ՀՀ քաղաքացիների ուշադրությունը առկա խնդիրներից, ձախողումներից շեղելու համար եւս մեկ վտանգավոր նախաձեռնությամբ հանդես գալ, որը երկիրը մեկ անգամ եւս կբաժանի սեւի եւ սպիտակի:

Վարչախումբը մտադիր է եւս մեկ փաստահավաք խումբ ստեղծել, որը ունենալու է աննախադեպ լիազորություններ, որն ավելի մեծ լիազորություններ է ունենալու, քան ՀՔԾ-ն, ԱԱԾ-ն, դատախազությունը եւ ոստիկանությունը միասին վերցրած, եւ որը զբաղվելու է 1991թ. սեպտեմբերի 21-ից մինչեւ 2018թ. ապրիլ Հայաստանում տեղի ունեցած մարդու իրավունքների խախտումներով:

Զավեշտն այն է, որ այս վարչախումբը, որը տապալել է համավարակի դեմ պայքարը, որի անգործության հետեւանքով կորոնավիրուսի հետեւանքով մենք ունենք աշխարհում աննախադեպ մահվան դեպքեր, որը ձախողել է Հայաստանի արտաքին քաղաքականությունը, որը քարուքանդ է արել տնտեսությունը, որը ուժ է կիրառել խաղաղ ցուցարարների դեմ, որը ապօրինաբար ազատությունից զրկել է ՀՀ երկրորդ նախագահ Ռոբերտ Քոչարյանին, որը երկիրը բաժանել է սեւի եւ սպիտակի, որը իրենց գործը տապալած նախարարներին եւ փոխնախարարներին հսկայական պարգեւավճարներ է բաժանել, ինքն իրեն հռչակել է իդեալական եւ անսխալական ու մտադիր է քննել բացառապես մինչեւ 2018թ. ապրիլ տեղի ունեցած դեպքերն ու իրադարձությունները:

Բնականաբար, նաեւ հարց է առաջանում, թե Հայաստանին նման հանձնաժողովն ինչու է պետք, այն էլ այսքան մեծ լիազորություններով: Եթե կա կոնկրետ դեպք, կոնկրետ տուժող, ի վերջո նա կարող է դիմել համապատասխան մարմիններին եւ գործին ընթացք կտրվի: Սա պարզից էլ պարզ է: Ի՞նչ նպատակ է հետապնդում անցյալը փորփրելը: Իհարկե, նպատակը պարզ է՝ ճնշել քաղաքական ընդդիմախոսներին, ժողովրդի ուշադրությունը շեղել խնդիրներից եւ փորձել բացարձակ բռնապետություն հաստատել՝ գեղեցիկ փաթեթավորմամբ:

Մասնագետներն արդեն իսկ շեշտում են, որ հրապարակված նախագիծը լեցուն է հակասահմանադրականությամբ: Միայն սա բավական է, որ այն մերժվի, բայց այն նաեւ պետք է մերժվի մեկ այլ կարեւոր պատճառով: Փաստահավաք խմբի աշխատանքն ավելի է թուլացնելու Հայաստանը, ավելի է խոցելի դարձնելու, երկրի պառակտումը մեծանալու է, իսկ ատելության մթնոլորտը հասնելու է գագաթնակետին:

Ի՞նչ տեղի կունենա, եթե ստեղծվի այս փաստահավաք խումբը եւ այն սկսի «ուսումնասիրել» մարդու իրավունքների զանգվածային խախտումները, սեփականության իրավունքի խախտումները, ոչ մարտական պայմաններում զինվորների մահվան դեպքերը, հանրաքվեները, ընտրությունները եւ շատ ու շատ այլ իրադարձություններ: Հասկանո՞ւմ եք չէ, որ երկիրը առաջ շարժվելու փոխարեն հայտնվելու է անդունդից էլ ներքեւ եւ այնտեղից դուրս գալ այլեւս չի ստացվելու:

Ո՞ւմ է սա ձեռնտու: Պարզ է, միայն մեր երկրի հակառակորդներին: Վերցնել եւ արհեստական խնդիրներ ստեղծել, վերցնել եւ փորփրել անցյալը, երբ մեզ մոտ ոչ քաղաքացիական պատերազմ է եղել, ոչ ցեղասպանություն, ոչ զանգվածային բռնաբարություններ, ոչ էլ այլ զանգվածային ծանր հանցագործություններ:

Ի՞նչ է անելու այս խումբը. չեղարկելո՞ւ է 1995թ. խորհրդանական ընտրությունների կամ սահմանադրական հանրաքվեի արդյունքները կամ չեղյալ է համարելու մինչեւ 2018թ տեղի ունեցած ընտրությունների, այդ թվում նաեւ 1996թ. նախագահական ընտրությունների արդյունքները: Ինչպե՞ս են հետաքննելու բանակում մահվան դեպքերը, ինչպես են որոշելու սեփականության իրավունքի խախտումները:

Այս հանձնախումբը, եթե ստեղծվի, ապա վերջին ծանր հարվածն է հասցնելու մեր պետությանը: Եթե վերցնում են եւ փորփրում անցյալը, եթե որոշում են սեփականության վերաբաշխում անել, եթե որոշում են իրենց վեր դասել ԱԱԾ-ից, ոստիկանությունից, ՀՔԾ-ից, ապա հետեւանքները ավելի ծանր են լինելու, քան պատկերացնում եք: Մարդկանց թշնամացնելու են միմյանց դեմ, մարդկանց ստիպելու են ֆինանսական շատ թե քիչ խնայողությունները տեղափոխել Հայաստանից՝ դրանից բխող բոլոր ծանր հետեւանքներով:

Չգիտես ում փողերով սնվող հկ-նե՞րն են իրականացնելու արդարադատություն: Մի՞թե այս աստիճան ենք ընկել: Իհարկե, ամեն ինչ պետք է անել, որ նման փաստահավաք խումբ չստեղծվի: Մենք ռեսուրսներ չունենք, որ ձրիակերների հերթական խմբին կերակրենք, որ նրանք փորփրեն անցյալը, երկիրը պառակտեն, թշնամանքի մթնոլորտը մեծացնեն, ունենալով հսկայական լիազորություններ, բայց չունենալով պարտականություններ:

Top-News.am