Կառավարությունը վաճառեց հերթական պետական գույքը
«Միջուկային և ռադիացիոն անվտանգության գիտատեխնիկական կենտրոն» փակ բաժնետիրական ընկերության 100 տոկոս պետական սեփականություն հանդիսացող բաժնետոմսերի 90 տոկոսն ուղղակի վաճառքի ձևով մասնավորեցվում է ընկերության աշխատավորական կոլեկտիվին։ նման որոշում կայացրեց կառավարությունը՝ մայիսի 27-ի նիստում։
Ընկերության բաժնետոմսերի 10 տոկոսի տնօրինման լիազորությունը վերապահվում է միջուկային անվտանգության կարգավորման կոմիտեին:
Ընկերության բաժնետոմսերի՝ Հայաստանի Հանրապետության կառավարության 1998 թվականի մարտի 27-ի N209 որոշմամբ սահմանված կարգով գնահատված արժեքը 2019 թվականի հուլիսի 1-ի դրությամբ կազմում է 112,989.2 հազ. դրամ:
Ուղղակի վաճառքի ձևով մասնավորեցման ենթակա Ընկերության 90 տոկոս բաժնետոմսերի վաճառքի գինը կազմում է 50,845.2 հազ. դրամ, որը համապատասխանում է գնահատված արժեքի 50 տոկոսին:
Ընկերության պարտավորությունները 2019 թվականի հուլիսի 1-ի դրությամբ (գնահատման պահ) կազմել են 115,293.0 հազ. դրամ, այդ թվում`
կրեդիտորական պարտքեր՝ գնումների գծով՝ 624.0 հազ. դրամ,
ստացված ընթացիկ կանխավճարներ՝ 35,168.0 հազ. դրամ,
կարճաժամկետ կրեդիտորական պարտքեր բյուջեին՝ 12,101.0 հազ. դրամ,
կարճաժամկետ կրեդիտորական պարտքեր պարտադիր սոցիալական ապահովագրության գծով՝ 177.0 հազ.դրամ,
կրեդիտորական պարտքեր աշխատավարձի և աշխատողների այլ կարճաժամկետ հատուցումների գծով՝ 10,300.0 հազ. դրամ,
կարճաժամկետ կրեդիտորական պարտքեր մասնակիցներին (հիմնադիրներին) շահութաբաժնի գծով՝ 17,551.0 հազ.դրամ,
այլ ընթացիկ պարտավորություններ՝ 39,372.0 հազ. դրամ։
«Միջուկային և ռադիացիոն անվտանգության գիտատեխնիկական կենտրոն» ՓԲԸ-ն ընդգրկված է «Պետական գույքի մասնավորեցման 2017-2020թթ. ծրագրի մասին» ՀՀ օրենքի ցանկերում: Ընկերության 100% պետական սեփականություն հանդիսացող բաժնետոմսերի տնօրինման լիազորությունը ՀՀ կառավարության 29.04.2010թ. թիվ 474-Ն որոշմամբ վերապահվել է Պետական գույքի կառավարման կոմիտեին: Բաժնետոմսերը Միջուկային անվտանգության կարգավորման կոմիտեի կողմից հանձնվել են Պետական գույքի կառավարման կոմիտեին 08.11.2017թ.-ի հանձնման-ընդունման ակտով:
Ներկայում ընկերությունում աշխատում են 30 մասնագետներ՝ 8-ը գիտությունների թեկնածուներ և գիտական աստիճանի հավակնորդներ, ճարտարագետներ, ֆիզիկոսներ, էներգետիկներ, տեղեկատվական տեխնոլոգիաների ոլորտի և ադմինիստրատիվ աշխատողներ: Կենտրոնի մասնագետները նպաստում են ՀՀ-ում միջուկային և ռադիացիոն անվտանգության ոլորտի համապատասխան մասնագետների պատրաստմանը՝ դասավանդելով ՀՀ առաջատար ԲՈւՀ-երում:
Կենտրոնի մասնավորեցման հիմնական նպատակն է երիտասարդ և մրցունակ (տարածաշրջանային մակարդակով) կադրերի պահպանումն ու ամրապնդումը, որը հնարավոր է իրականացնել աշխատավորական կոլեկտիվի շահագրգռվածության բարձրացմամբ և բարձր որակավորում ունեցող մասնագետների արտահոսքի կանխմամբ՝ ընկերության բաժնետոմսերը կոլեկտիվին մասնավորեցնելու միջոցով:
Նշվում է, որ մրցույթով կամ աճուրդով մասնավորեցնելը կարող է վտանգել ընկերության բնականոն աշխատանքը: Բաժնետոմսերի 10 տոկոսի տնօրինման իրավունքը թողնելով Հայաստանի Հանրապետությանը, ի դեմս՝ ՀՀ միջուկային անվտանգության կարգավորման կոմիտեի, հնարավորություն կտա կոմիտեին մասնակցել ընկերության կառավարմանը, տեղյակ լինել արտադրատնտեսական գործունեությանը, հանդես գալ առաջարկություններով՝ ընկերության գործունեության ուղղությունների վերաբերյալ:
Արդարադատության նախարարությունը կարծիք է հայտնել, որ պետական սեփականություն հանդիսացող բաժնետոմսերի 90 տոկոսն ուղղակի վաճառքի ձևով մասնավորեցնելու պարագայում, Ընկերության աշխատավորական կոլեկտիվը միջուկային և ճառագայթային անվտանգության ոլորտում ձեռք է բերում գերիշխող դիրք և, ըստ էության, պետությունը կախվածության մեջ է ընկնում հիշյալ ոլորտում գերիշխող դիրք զբաղեցնող մասնավոր ընկերությունից: Նախարարությունն առաջարկել է, որ լրացուցիչ քննարկման առարկա դարձնել խնդիրը: Առաջարկը, սակայն, չի ընդունվել։