Ձախողելու եւ հաջողելու մասին այս պահին դեռ շատ վաղ է խոսել. Մակունցը՝ կորոնավիրուսի թվերի մասին
ԱԺ-ում դիմակներ կրելը առաջին հերթին պայմանվորված է պարետատան այն պահանջներով, որոնք հստակ մատնանշում են վիճակագրությունը, ինչպես նաեւ հետազոտությունների արդյունքները։ Այս մասին այսօր՝ մայիսի 26-ին, ԱԺ-ում լրագրողների հետ ճեպազրույցի ժամանակ ասաց «Իմ քայլը» խմբակցության պատգամավոր Լիլիթ Մակունցը՝ պատասխանելով լրագրողի հարցին, թե բոլորը ԱԺ-ում դիմակներ են կրում, դիմակ կրելու քարոզչություն է գնում, ի՞նչ փոխվեց, ինչո՞վ է սա պայմանավորված։
«Թվերի առկայությունը խոսում է այն մասին, որ մենք բոլորս անկախ նրանից մեզ համարում ենք վարակակիր, թե ոչ հարկ է, որ բոլոր միջոցները ձեռնարկենք։ Քանի որ այս պահին ԱՆ եւ պարետատան ունեցած տվյալներով է դիմակները կատարում են կանխարգելիչ գործառույթ, ինքներս պետք է այդ պատասխանատվությունը ստանձնենք եւ թույլ չտանք վարակի ավելի տարածմանը»,- ասաց պատգամավորը։ Լրագրողի դիտարկմանը, որ ընդդիմությունը նշում է, որ դուք ձախողել եք համավարակի դեմ պայքարը եւ դրա մասին են խոսում 400-500-ի հասնող թվերը, Մակունցը պատասխանեց․ «Ձախողելու եւ հաջողելու մասին այս պահին դեռ շատ վաղ է խոսել, որովհետեւ կորոնավիրուսը դեռ հաղթահարված չէ, ինչպես Հայաստանում, այնպես էլ ամբողջ աշխարհում, եւ այս պահին խոսել ձախողումների կամ հաջողումների մասին, կարծում եմ տեղին չէ։ Պետք է հնարավորինս անել առավելագույնը, որպեսզի ՀՀ-ում վարակի թվերը նվազեն եւ տարածումը հնարավորինս կարողանանք նվազեցնել։ Կարծում եմ այս հարցում չպետքէ լինեն տարանջատումներ իշխանությունների եւ ընդդիմությունների միջեւ, որովհետեւ բոլորիս գերագույն նպատակը պետք է լինի այն, որ ՀՀ-ում այս իրավիճակում, բոլորս հաջողենք»: