Պետք է կոչ անեմ մեր քաղաքացիներին լինել կարգապահ, առաջնորդվել բանականությամբ, զգույշ լինել․ Արմեն Սարգսյան
Կարծում եմ, որ անկախ հանգամանքից, թե ինչ քաղաքականություն են որդեգրել կառավարությունն ու պարետատունը, ես պետք է կոչ անեմ մեր քաղաքացիներին լինել կարգապահ, առաջնորդվել բանականությամբ, զգույշ լինել։ Այս մասին «Երկիրմեդիա» ՀԸ Աննա Իսրայելյանի «Երկրի հարցը» հաղորդաշարին ասել է ՀՀ նախագահ Արմեն Սագսյանը։
«Մենք պետք է մտածենք, թե մեզանից յուրաքանչյուրն ինչ պետք է անի, ինչ նեդրում պետք է ունենա վիրուսի հաղթահարման ընդհանուր գործում», ասել է ՀՀ նախագահը։ Արմեն Սարգսյանը պատմել է, որ խոսել է տարբեր երկրների ղեկավարների հետ, աջակցությունն ու նրանց փորձն է խնդրել։ Արդյունքում Արաբական Էմիրություններից եւ Չինաստանից Հայստանը մեծ քանակությամբ անհրաժեշտ պարագաներ է ստացել։
Նախագահ Արմեն Սարգսյանը պատմել է, որ պարբերաբար խոսում է Նուբար Աֆեյանի հետ, որի ընկերությունը մշակում է կորոնավիրուսի դեմ պատվաստանյութը, Օքսֆորդի համալսարանի հետ, որտեղ նույնպես դեղամիջոցի մշակումն է արվում, որպեսզի առաջին իսկ հնարավորության դեպքում Հայաստանը առավելագույն շուտ հաղթահարի այդ խնդիրը։
Հիշատակելով խորհրդային վերջին տասնամյակների մոտեցման արդյունքում Երեւանում կենտրոնացվեց գիտական եւ արդյունաբերական ներուժը, ասել է նախագահ Սարգսյանը եւ կարծիք հայտնել, որ ժամանակակից աշխարհում, մասնավորապես առողջապահության կենտրոնացումը լավագույն լուծումը չի։
«Պետք է տարածության մեջ փռված լինի։ Գորիսում կա բուժկենտրոն, որը Մարսելի եւ այդ քաղաքի հայ համայնքի օգնությամբ է ստեղծվել, որտեղ սրտի ստենդ են դնում եւ փրկում հարյուրավոր կյանքեր։ Ժամանակակից էլեկտրոնային համակարգերը հնարավորություն տալիս են, որ բժիշկը հեռվից ախտորոշի կամ առողջապահական այլ խնդիր լուծի։ Գիտությունը ավելի մեծ ուշադրություն պետք է դարձնի կենսաբանությանն ու առողջապահությանը։ Եթե մենք ենթակառուցվածքային խնդիրներ լուծենք, ճանապարհներ կառուցենք՝ ամեն ինչ եԵրեւանում չի կենտրոնանա։ Իմ պատկերացրած ապագա Հայաստանում Երեւանն ավելի փոքր բնակչություն պետք է ունենա, Գյումրիի ու Վանաձորի բնակչությունը պետք է ավելանա։ Մենք 40 րոպեում կարող ենք հասնել հեռու թվացող բնակավայր»։
Ա․Սարգսյանը պատմել է, որ զրուցել է Արցախի նորընտիր նախագահի հետ եւ, մասնավորապես, անդրադարձել գյուղատնտեսական մի խնդրի։ Արցախում այսօր կա 60-70 հազար գլուխ ոչխար, սակայն օժանդակության ծրագրերով հնարավոր է այդ թիվը հասցնել 500-600 հազարի եւ արտահանել Հայստանի միջոցով հարեւան երկրներ։
«Մենք պետք է ծրագիր ունենայինք եւ Արցախի բնակչության ավելացման խնդիր լուծեինք։ Այսօր այնտեղ բնակվում է 150 հազար մարդ։ Սակայն կարելի էր արագ օգնելով մարդկանց վերաբնակեցման հարցում, այդ թիվը հասցնել 400 հազարի», ասել է ՀՀ նախագահը։