Օրվա ամփոփում. 19.05.2020
Մայիսի 19-ին Խորհրդային Միությունում նշում էին Պիոներիայի հիմնադրման օրը: Այդ օրը երրորդ դասարանցիների մեծ մասը պիոներ էր դառնում եւ խոստանում լինել միշտ պատրաստ: Խորհրդային Միությունն արդեն երեսուն տարի չկա, բայց պիոներները՝ միշտ պատրաստները կան:
Պետք է՝ կհավատան, որ կորոնավիրուսն աշխարհի ամենասարսափելի հիվանդությունն է եւ կազմակերպված, բայց իրականում անկազմակերպ եւ քյալագյոզավարի կպայքարեն այն վերացնելու համար: Պետք լինի՝ ամեն ինչ կանեն, որ կորոնավիրուսով հիվանդների թիվը ամենաշատը հենց իրենց վստահված գոտում լինի: Հանձնարարականի դեպքում միշտպատրաստները կգնան դատարաններ կշրջափակեն կամ կհավաքվեն Ազգային ժողովի մոտ, իրականում չհասկանալով, թե ինչու համար:
Պիոներների օրը ժամանակակից կամ նեոպիոներները նշանավորեցին մի քանի կարեւոր իրադարձություններով: Նախ առավոտ շուտ հասցրեցին հայտարարել, որ Հայաստանում եւս 218 մարդ վարակվել է կորոնավիրուսով: Ի դեպ, հարեւան Վրաստանում վարակվել էր միայն մեկը:
Իսկ հետո միշտպատրաստների առաջնորդը սպառնաց, որ տուգանելու է բոլորին, ով կհանդգնի դիմակ չկրել: Եւ սա այն մարդը, որը ժողովրդին իրար գլխի էր հավաքում, որ համոզի, որ Հայաստանի բարեկեցությունը կախված է նրանից, որ ՍԴ-ն կգլխավորի ոչ թե Հրայր Թովմասյանը, այլ իր սրտի փաստաբան Վահե Գրիգորյանը:
Վարչապետը, կարծես թե, մոռացել է, որ ինքը վարչապետ է: Այսօր անում էր արտահայտություններ, որոնք անում էին պիոներները չորրորդ կամ հինգերորդ դասարանում: Ի՞նչ է նշանակում ասել, թե ինձ ասում են ապացուցիր, թե ուղտ չես: Չէ, համաձայնեք, սա վարչապետի, անգամ համատիրության ղեկավարի մակարդակ չէ:
Կամ ի՞նչ է նշանակում ուզում եք հավատացեք, ուզում եք մի հավատացեք արտահայտությունը: Մի՞թե պետության ղեկավարը պարտավոր չէ հերքել կամ դիմել իրավապահներին, երբ հնչում են շատ լուրջ եւ կոնկրետ մեղադրանքներ: Պատկերացնո՞ւմ եք Բիլ Քլինթոնն ասեր՝ ուզում եք հավատացեք, թե Մոնիկայի հետ սեքս եմ արել, ուզում եք՝ ոչ, կամ Նիկոլյա Սարկոզին ասեր ուզում եք հավատացեք, ուզում եք՝ ոչ եւ հրաժարվեր գնալ դատարան կամ հարցաքննության:
Մեզ մոտ ամեն ինչ էլ հնարավոր է: Արսեն Թորոսյանը հայտարարեց, որ չի վստահում դատական համակարգին եւ չի պատրաստվում կատարել որոշումը եւ մնաց իր պաշտոնին, չնայած երեկ ասում էր, թե իր չվստահած համակարգին է հանձնելու նրանց տվյալները, ովքեր չեն հավատում կորոնավիրուսին:
Ի դեպ, Թորոսյան Արսենը կարող է իրավապահներին փոխանցել նաեւ ԱՄՆ նախագահ Դոնալդ Թրամփի որդու տվյալները, որն այսօր հայտարարեց, որ կորոնավիրուսը հորինվածք է եւ այն կանհետանա նոյեմբերի երեքին:
Հարկ է նշել, որ օրվա ամենակարեւոր եւ նշանակալից իրադարձություններից է նաեւ Սոչիից ՀՀ 212 քաղաքացիների վերադարձը Հայաստան: Նրանք Ռուսաստանում էին մնացել կորոնավիրուսային համավարակի պատճառով:
Բացասական լրահոսի միջից առանձնանում է նաեւ լուրը, որ Տաթեւիկ Ռեւազյանը որդի է ունեցել: Հուսանք, որ նա կմնա Դանիայում եւ կզբաղվի երեխայի դաստիարակությամբ, բայց ոչ այնպես, ինչպես վարվում էր Հայաստանի քաղավիացիայի հետ:
Իսկ Նիկոլ Փաշինյանն ակնհայտորեն նյարդայնացած Կրասնոդարում եւ Վորոնեժում հայկական ծխախոտով բեռնված օդանավերի կալանավորումից սպառնում էր հպարտ եւ դուխով իր ընտրողներին, որ, ով դիմակ չկրի, տուգանելու է եւ դեռ մի բան էլ մատ թափ տվեց եւ ասաց, թե չասեք աղքատ ենք, անապահով ենք եւ այլն ու եւ այլն:
Նյարդայնության ապացույց է նաեւ Նարեկ Մալյանի դեմ քրեական գործի հարուցումը եւ Արթուր Դանիելյանին հարցաքնության հրավիրելը:
Գուցե Փաշինյանին նյարդայնացնում է նաեւ այն, որ չկարողացավ ՍԴ-ն իրենով անել: Այսօր արդեն Վենետիկի հանձնաժողովը լավ լուր համարեց այն, որ ՀՀ կառավարությունը ՍԴ-ի հարցով դիմել է իրենց: Հիշեցնենք, որ իմքայլական մի կարկառուն պատգամավոր, որին վստահվել էր հանրաքվեն հորով-մորով անելու օպերացիան, պնդում էր, թե Վենետիկի հանձնաժողովում կոռուպցիոներներ են նստած:
Շատ կարեւոր եւ շատ բան ասող եւս մեկ լուր. ԱԱԾ քննչական դեպարտամենտի պետ Արթուր Աղաջանյանը հրաժարական է տվել, չհանդուրժելով Արգիշտի Քյարամյանի մուտքը Անվտանգության ծառայություն: Հնարավոր է սա եւս նյարդայնացրել էր Նիկոլ Փաշինյանին, որն այսօր ավելի քան նյարդայնացած էր եւ ավելի քան անհամոզիչ:
Եւ օրն ամփոփենք կրկին կորոնավիրուսային թեմայով: Մինչ ՀՀ իշխանությունները սարսափազդու թվերով վախեցնում են հայաստանցիներին, այս շոգին պարտադրում դիմակ եւ ձեռնոց կրել, երբ դա առողջությանը միայն ու միայն վնաս է, Իտալիան եւ Իսպանիան բացում են ծովափերը, նույնն անում է եւ Վրաստանը, իսկ ԱՄՆ նախագահը վերջնագիր է ներկայացրել Առողջապահության համաշխարհային կազմակերպությանը (ԱՀԿ)` եթե կառույցը «էական բարեփոխումներ չանի» առաջիկա 30 օրում:
Թրամփն արդեն մի քանի անգամ հստակ ակնարկել է, որ կորոնավիրուսային այս արկածախնդրության համար ԱՀԿ-ն եւ նրանց թիկունքում կանգնածները, մեղմ ասած, բացատրություն են տալու:
Top-News.am