Առանց գրավոր հրամանի մեզ անաշխատունակության թերթիկով 20% պակաս են վճարում. Մարալիկի հիվանդանոցի բուժքույր
Մեր բուժաշխատողների մի մասը՝ 22 բուժաշխատող, հիվանդացել է կորոնավիրուսով, որի մեղավորը իրենք չէին, նրանց մի մասին տեղափոխեցին ինֆեկցիոն հիվանդանոց, մյուս մասին էլ մեկուսացրին, իսկ մնացածներս ինքնամեկուսացանք տներում: Այս մասն Tert.am-ին պատմեց Մարալիկի հիվանդանոցի ընտանեկան բուժքույր Աննա Այվազյանը:
Նշենք, որ հիվանդանոցի բուժաշխատողները դժգոհ են, քանի որ կորոնավիրուսով վարակվելուց հետո, նրանց անաշխատունակության թերթիկով 20 տոկոս ավելի քիչ աշխատավարձ են վճարում:
«Երկու անգամ մենք թեստավորվել ենք, երկու թեստերի արդյուքնն էլ եղել է բացասական ու հիմա մի կերպ եկել ենք աշխատանքի: Այսինքն՝ մեզ թույլ չէին տալիս աշխատել, ստիպում էին անցնել երրորդ թեստավորումը, բայց մենք գիտեինք, որ ինքնամեկուսացվածներին երրորդ թեստավորում չկա, եթե երկու թեստերի արդյունքները բացասական են: Անցանք աշխատանքի ու հիմա մեզ ասում են, որ պետք է վճարվենք անաշխատունակության թերթիկով, ո՞վ է մեղավոր մեր այս կարգավիճակի համար: Մենք բուժաշխտողներ ենք և հիվանդանա՞նք, և աշխատավարձերը ցածր ստանա՞նք»,- նշեց Աննա Այվազյանը:
Նրա խոսքով՝ մի քանի անգամ դիմել են հիվանդանոցի տնօրենի ժամանակավոր պաշտոնակատարին, նա պատասխանել է, որ մարզի առողջապահույան վարչությունից ասել են՝ պետք է անպայման անաշխատունակության թերթիկ:
«Խնդիրն այն է, որ գրավոր ոչ մի հրաման չկա, ինչ ասում են՝ բանավոր է: Մենք ուզում ենք իմանալ, եթե օրենքով է, կա գրավոր հրաման, որ մեր աշխատավարձը լինի 80 տոկոս, անաշխատունակության թերթիկով, մենք հարմարվենք այդ մտքի հետ, բայց բանավոր հրամանով ինչպե՞ս կարելի է մարդու աշխատավարձ հաշվարկել: Բացի դրանից, մեր բժշկուհին, որը մեզ հետ եղել է ինքնամեկուսացման մեջ, հիմա նրան ստիպում են քաղաքացիներին անաշխատունակության թերթիկ տալ, իրար հակասող դրույթներ են, եթե բժշկուհին անաշխատունակության մեջ է, ինչպե՞ս կարող է մեկ ուրիշին բյուլետեն տալ»,- շեշտեց նա:
Աննա Այվազյանի խոսքով՝ իրենք զանգել են պատկան մարմիններին, որոնք իրենց հարցերին չեն պատասխանել, այլ մի հեռախոսահամարից փոխանցել են այլ հեռախոսահամար: «Առողջապահության թեժ գիծ ենք զանգել, թեժ գիծը մի քանի համար է տվել, պարետատուն ենք զանգել: Ամենավերջում մեզ հաջողվեց գտնել Ծաղիկ Վարդանյանի համարը, նա մեզ պատասխանեց՝ դա համաձայնեցված է մեր մարզի առողջապահության վարչության հետ, մենք պետք է վճարվենք անաշխատունակության թերթիկով: Իսկ երբ ես հարցրի՝ իսկ շտապօգնության աշխատողները ինչպե՞ս պետք է վարձատրվեն, նա պատախանեց՝ ես կարո՞ղ եմ արթիկցուն, գյումրեցուն վճարել հարյուր տոկոս, մարալիկցուն էլ նույնքան: հարյուր տոկոս: Տարբերությունն այն էր, որ մենք եղել ենք ինքնամեկուսացման մեջ»,- հայտարարեց նա:
Աննա Այվազյանը հավելեց՝ քանի որ ոչ մեկ իրենց հարցին պատասխան չի տալիս, բոլորն իրենց աշխատանքից անտեղյակ են, նախարարից խնդրում են, որ գոնե նա պատասխանի, եթե գրավոր հրաման կա, իմանան: «Մենք գիտենք, որ պարետի հրամանով աշխատավարձերը պետք է պահպանվեն, այն էլ բուժաշխատողի»,- շեշտեց բուժքույրը: