Կորոնավիրուս եւ միայն կորոնավիրուս

Կորոնավիրուսը մարդկանց ուղեղում է: Մարդը հեռուստացույցով, ռադիոյով, մամուլով անդադար լսում եւ կարդում է կորոնավիրուսի եւ կորոնավիրուսային համավարակի մասին: Թե ի՞նչ հետեւանք է ունենալու այս ամենը մարդկանց գիտակցության եւ հոգեկան աշխարհի վրա գուցե իմանան նրանք, ովքեր ամեն ինչ անում են, որ լուրերի հիմնական մասը նվիրված լինի կորոնավիրուսին:

Տարօրինակ իրավիճակ է այս առումով նաեւ Հայաստանում: ՀՀ առողջապահության նախարար Արսեն Թորոսյանը պարբերաբար սարսափեցնող սցենարներ է ներկայացնում, հրապարակվում են պաշտոնական վիճակագրություն, ըստ որի ամեն օր կորոնավիրուսով վարակվում է հարյուրից ավելի մարդ, բայց միաժամանակ սահմանափակումները վերացվում են:

Ի դեպ, մարտին, երբ արտակարգ դրություն մտցվեց եւ կարանտին սահմանվեց, ամեն օր վարակվում էին ընդամենը մի քանի հոգի:

Եւ այսքանից հետո ստիպված ես մտածել, որ կորոնավիրուսը եթե գոյություն ունի էլ, ապա սարսափելի չէ եւ վտանգավոր չէ, հակառակ դեպքում սահմանափակումները չէին հանվի կամ ՀՀ իշխանությունները հակամարդկային քայլերի են դիմում:

Իհարկե, այս հարցի պատասխանը որեւէ մեկն այդպես էլ չի տալու: Փոխարենը աշխարհը եւ Հայաստանը շարունակ խոսում է կորոնավիրուսի մասին: Անդադար: Վերցնենք հայաստանյան երեք լրատվամիջոց եւ նայեն առավոտյան ութից մինչեւ ժամը 12-ն ընկած լրահոսը:

Եւ այսպես, միջին հաշվով լուրերի 75 տոկոսը այսպես կամ այնպես առնչվում է կորոնավիրուսին: Կորոնավիրուս եւ միայն կորոնավիրուս: Պատահական չէ, որ բակերում եւ տանը երեխաներն արդեն կորոնավիրուս-կորոնավիրուս են խաղում:

Աննա Բաղդասարյան

Top-News.am