Ռուսաստանը կարող է ԵԱՏՄ-ի համար գազի գնի հարցում զիջումների գնալ, բայց հայ-ռուսական հարաբերությունները դրանից չեն լավանա. Վլադիմիր Լեպեխին
Եվրասիական տնտեսական միության ինստիտուտի տնօրեն Վլադիմիր Լեպեխինի հետ Tert.am-ը զրուցել է Հայաստան մատակարարվող գազի սակագնի հնարավոր բարձրացման վերաբերյալ: Նրա խոսքով` հայաստանյան սպառողների համար գազի սակագնի հարցի բարձրացումը հենց Հայաստանի իշխանությունների նախաձեռնությունն է, քանի որ դա զուտ հայաստանյան ներքաղաքական հարց է:
-Պարոն Լեպեխին, այս օրերին Հայաստանում քննարկվում է Ռուսաստանից Հայաստան մատակարարվող գազի սակագնի հնարավոր բարձրացման հարցը: Ձեր կարծիքով` ՀՀ այսօրվա իշխանությունների, որոնք ժամանակին բողոքի ակցիաներ էին կազմակերպում ՌԴ նախագահ Պուտինի դեմ, մեղավորությունը կա՞ այս հարցում: Ինչու՞ է հիմա հարցը դիտարկվում:
-Հայաստանյան սպառողների համար գազի սակագնի հարցի բարձրացումը հենց Հայաստանի իշխանությունների նախաձեռնությունն է, քանի որ այդ գինը զուտ հայաստանյան ներքաղաքական հարց է: Ռուսաստանը դրա հետ որևէ կապ չունի: Այս իրավիճակում, երբ նավթի համաշխարհային գները կտրուկ անկում են ապրել և սկսել է էժանանալ գազը, Ռուսաստանը, հակառակը, որոշել է իր գործընկերների, այդ թվում Հայաստանի համար, պահպանել գազի գործող սակագինը:
Հայաստանի Հանրապետությունը որոշել է իր սպառողներին գազի սակագնի հարցը դիտարկել` հաշվի առնելով իրավիճակը, որը կորոնավիրուսի տարածման հետևանքով առաջացել է հայաստանյան տնտեսությունում: Ցանկանում է գտնել ֆինանսական պարզ աղբյուր բյուջեն համալրելու: Ռուսաստանում առաջարկ է եղել 3 տոկոսով ավելացնել գազի սակագինը ՌԴ քաղաքացիների համար, որպեսզի սպառողների հաշվին կոմպենսացվեն կառավարության ծախսերը: Հայաստանում նույնպես պաշտոնյաները քննարկում են այդ հարցը, որպեսզի սպառողների հաշվին` գազի գնի բարձրացումով, լրացուցիչ եկամուտ բյուջեում ստանան:
-Ռուսական գազի սակագնի հարցը ՀՀ վարչապետ Նիկոլ Փաշինյանը քննարկել էր նաև Բելառոսի նախագահ Ալեքսանդր Լուկաշենկոյի հետ: Դա կողքից ի՞նչ տպավորություն է ստեղծում:
-Նիկոլ Փաշինյանը հայաստանյան սպառողին մատակարարվող գազի սակագնի բարձրացման հարցի հետ միաժամանակ ցանկանում է, որ Ռուսաստանն իջեցնի Հայաստանին վաճառվող գազի գինը: Այդ ժամանակ կառավարությունը ռուսական գազից կստանա կրկնակի մարժա` իր սպառողներից և նաև Ռուսաստանից ստացած զեղչերի հաշվին: Լրիվ նույն կերպ է մտածում նաև Ալեքսանդր Լուկաշենկոն: Բելառուսի և Հայաստանի ղեկավարները մտադիր են համատեղ ճնշում գործադրել Ռուսաստանի վրա: Ճիշտ պահ է ընտրվել. Ռուսաստանը հիմա շատ ծանր դրության մեջ է` կապված նավթի արհեստական գնակնման հետ: Լուկաշենկոն և Փաշինյանը մտադիր են օգտվել իրավիճակից և գումար աշխատել Ռուսաստանի հաշվին` հույս ունենալով, որ վերջինս զիջումների կգնա:
Տեսականորեն Ռուսաստանը կարող է ԵԱՏՄ գործընկերներին զիջումներ անել, բայց հայ-ռուսական հարաբերությունները դրանից չեն լավանա, քանի որ բարոյական առումով Հայաստանն ու Բելառուսը հիմք չունեն պահանջելու, որ իրենց մատակարարվող գազի սակագինն իջնի: Առանց այն էլ այն շատ ցածր է` վաճառվում է համարյա ինքնարժեքով:
-Վարչապետ Նիկոլ Փաշինյանը մեկ անգամ չէ հայտարարել, որ փայլուն հարաբերություններ ունի ՌԴ նախագահ Վլադիմիր Պուտինի հետ…
-Պետք է Ռուսաստանի ղեկավարության վերաբերմունքը Հայաստանի նկատմամբ տարբերել Փաշինյանի նկատմամբ եղած վերաբերմունքից:
Հայաստանի և հայ ժողովրդի նկատմամբ Ռուսաստանի և ՌԴ քաղաքացիների վերաբերմունքը շատ դրական է: Հայաստանը համարվում է Ռուսաստանի ամենամոտ գործընկերը, ինչպես Բելառուսը: Ինչ էլ Հայաստանի հետ պատահի, հայ ժողովուրդը համարվելու է եղբայրական: Նիկոլ Փաշինյանի նկատմամբ վերաբերմունքը հայելային է, այսինքն՝ կախված է նրանից, թե ինչպիսի քաղաքականություն է վարելու Փաշինյանը Ռուսաստանի նկատմամբ: Հաշվի առնելով, որ Նիկոլ Փաշինյանը շատ ժամանակ է տրամադրում Ռուսաստանի հետ հարաբերությունները զարգացնելու վրա, նրա անձնական հարաբերությունները Վլադիմիր Պուտինի հետ կարելի է համարել լավ: