Չեղավ, անլրջացնում եք, դե լավ Դուք լրջացրեք․ իմքայլական պատգամավորները բախվեցին իրար
«Իմ քայլի» պատգամավոր Արթուր Դավթյանն ու Աննա Կարապետյանն առաջարկում են փոփոխություններ կատարել ՀՀ Դատական օրենսգրքում:
Նախագծի հիմնական զեկուցող իմքայլական Արթուր Դավթյանի խոսքերով, այսօր գործող օրենքներով մագիստրատուրայի կրթությունը պարտադիր չէ փաստաբան, քննիչ, դատախազ դառնալու համար:
Դատավորի դեպքում այլ կարգավորում կա, չնայած Սահմանադրությունը սահմանում է, որ դատավոր կարող է լինել բարձրագույն կրթություն ունեցող անձը, իսկ բարձրագույն կրթության մասին օրենքում նշվում է, որ բարձրագույն կրթություն է համարվում և մագիստրատուրան և բակալավրիատը. «Այսինքն, անձը, սովորելով կամ բակալավրիատում կամ մագիստրատուրայում, ունենում է բարձրագույն իրավաբանի կրթություն: Մենք տեսնում ենք, որ Սահմանադրության և դատական օրենսգրքի մեջ հակասություն կա»:
Պատգամավորը ճիշտ չի համարում այն, որ անձը դատավոր դառնա միայն մագիստրատուրայի կրթությամբ, քանի որ հիմնական կրթությունը ստանում են բակալավրիատում:
Իմքայլական պատգամավորներն առաջարկում են, եթե անձն ունի և բակալավրի և մագիստրոսի կրթություն, նրան թույլ տրվի դառնալ դատավոր, իսկ եթե մագիստրատուրա, դրա փոխարեն պետք է ունենա 15 տարվա իրավաբանի մասնագիտական ստաժ:
«Իմ քայլը» խմբակցության պատգամավոր Նիկոլայ Բաղդասարյանը ցանկացավ իմանալ՝ արդյոք այլ երկրներում այս փորձը կիրառվո՞ւմ է, ուսումնասիրվե՞լ է արդյոք այլ պետությունների փորձը:
Դավթյանը հայտարարեց, որ տարբեր երկրներում տարբեր կարգավորումներ կան, պետություն կա, որտեղ մարդը կարող է դատավոր դառնալ 50 տարեկանից հետո. «Տեսեք, օրինակ, Դուք չունեք մագիստրատուրայի կրթություն, ուստի այս օրենքը լավ հնարավորություն է տալիս, որ Դուք դատավոր դառնաք»:
«Հարցս այլ էր, Դուք կատակի եք վերածում»,-արձագանքեց Բաղդասարյանը:
«Ուսումնասիրել եմ: Տեղ կա՝ կա, տեղ կա՝ չկա: Ի՞նչ կապ ունի դա այս նախագծի հետ: Օրինակ Ճապոնիայում կա, Չինաստանում չկա: Ի՞նչ կապ ունի դա»,-ասաց Դավթյանը:
«Դե այդպես չեղավ, անլրջության եք վերածում»,-պատասխանեց Բաղդասարյանը:
«Դե լավ, Դուք լրջացրեք հարցը»,-հայտարարեց Բաղդասարանի թիմակիցը:
Երբ Բաղդասարյանը նշեց, որ ցանկանում է իմանալ, թե որքանո՞վ են վտանգավոր այս նախագծի հնարավոր հետևանքները, Դավթյանը պատասխանեց. «Ահավոր վտանգավոր է, երբ կորոնավիրուսի պայմաններում է»:
«Այլ պետություններում ի՞նչ հետևանքներ է ունեցել այդ կարգավորումը»,-կրկին հարցրեց Բաղդասարյանը:
Հարցն, ըստ էության, մնաց անպատասխան:
Աղբյուրը՝ analitik.am