ԵՄ-ն կենթարկվի Էրդողանի պահանջներին
ԵՄ-ի եւ Թուրքիայի նախագահ Ռեջեփ Թայիփ Էրդողանի միջեւ Թուրքիայում միլիոնավոր փախստականների ճակատագրի շուրջ բանակցություններն ավարտվել են նրանով, որ յուրաքանչյուր կողմը հայտարարել է իր դիրքորոշման եւ մյուսից դժգոհության մասին, նշում է Bloomberg-ը:
«Այնուհետեւ թուրք նախագահը տուն է ուղեւորվել, որ կրկին դատապարտի ուխտադրուժ եվրոպացիներին, որոնք խուսափում են սարսափելի հումանիտար ճգնաժամի դեմ պայքարում պատասխանատվությունից: Եվրոպացի առաջնորդներն իրենց հերթին հանդես են գալիս ցինիկ Էրդողանի դեմ, որն այս ճգնաժամն օգտագործում է ավելի շատ փող շորթելու համար:
Շուտով սկսվելու է երկրորդ գործողությունը, որի ժամանակ խաղացողները շարժվելու են որեւէ որոշման ուղղությամբ: Գերմանիայի կանցլեր Անգելա Մերկելը արդեն հայտարարել է դա անելու պատրաստակամության մասին:
Դա կօգներ բոլորին, հատկապես փախստականներին, եթե խաղացողները կարողանային արագ անցնել երրորդ գործողությանը, որում Եվրոպան խոստանում է ավելի շատ միջոցներ հատկացնել, եւ Էրդողանը դժկամությամբ համաձայնվում է փախստականներին Թուրքիայում պահել: Քանի որ սա միակ հնարավոր արդյունքն է, դրան որքան արագ հասնեն, այնքան ավելի լավ կլինի:
Էրդողանին արագ վճարելը փախստականներին կազատի այս անտանելի ֆարսում որպես հենարան օգտագործվելուց, որոնք առանց այն էլ աներեւակայելի դժվարություններ ու նվաստացում են վերապրում: Եվրոպական սահման քշվելը՝ փրկության կեղծ հույսով, իսկ այնուհետեւ արցունքաբեր գազով ու գնդակներով մերժվելը, անկասկած, մարդու իրավունքների խախտման ձեւ է:
Իմաստ չունի խոսել ճգնաժամի չափերի կամ մարդկանց ծանր վիճակի մասին, որոնք ներքաշվել են դրա մեջ. ՄԱԿ Փախստականների գործերով գործակալության գնահատմամբ՝ Թուրքիայում կա 4,1 միլիոնից ավելի փախստական, այդ թվում՝ 3,7 միլիոն Սիրիայից: Սիրիական Իդլիբ նահանգում վերջին ռազմական գործողությունները դեպի Թուրքիա փախստականների նոր հոսք առաջացրին, եւ հազիվ թե հիմա խարխուլ վրաններում ապրող հարյուր հազարավոր մարդիկ մեծ հույսեր են կապում Էրդողանի եւ ռուս նախագահ Վլադիմիր Պուտինի միջեւ հրադադարի մասին համաձայնագրի հետ: Երբ ռազմական գործողություններն անխուսափելիորեն վերսկսվեն, Թուրքիայի սահմանին հուսահատ սիրիացիների ճնշումը կաճի երկրաչափական պրոգրեսիայով:
Ընդհանուր օրինավորությունը ԵՄ-ից պահանջում է 2016 թվականի գործարքի ֆինանսական պայմանների բարելավում, ըստ որի՝ եվրոպացիները համաձայնվել էին փախստականներին օգնելու համար Թոուրքիային հատկացնել 6 մլրդ դոլար: Հավանական է, որ նրանք կպատասխանեն Էրդողանի շանտաժին՝ վճարեք, կամ ես փախստականներին կուղարկեմ ձեզ մոտ:
Նրանց համար, ովքեր, հնարավոր է, մոռացել են վախի եւ այլատյացության բռնկումները, որոնք 5 տարի առաջ Եվրոպան ցնցեցին մինչ այն, երբ Թուրքիան կանգնեցրեց փախստականների հոսքը, անցյալ շաբաթ ստացվեց սթափեցնող հիշեցումը: Այն ժամանակ, երբ Էրդողանի կողմից հրահրվող մի քանի հազար փախստականները փորձում էին հատել Հունաստանի սահմանը, Աթենքում կառավարությունը դադարեցրել էր ապաստան տրամադրելու դիմումների ընդունումը: Բռնության սպառնալիքներ էին եղել տեղացի ջոկատայինների կողմից եւ սարսափելի նախազգուշացումներ ամբողջ Եվրոպայում ծայրահեղ աջ քաղաքական գործիչներից:
ԵՄ ղեկավարությունը կարող է Թուրքիային մեղադրել փախստականներին զինելու մեջ, բայց նրանք պետք է ընդունեն մեղքի իրենց մեծ բաժինը սեփական միգրացիոն համակարգերը բարեփոխելու անընդունակության համար եւ այն բանի, որ իրենց խոցելի են դարձրել թուրքական սպառնալիքների համար:
Հույս կա, որ եվրոպացիները որոշ փախստականների կընդունեն, համենայնդեպս՝ առավել խոցելիներին: Էրդողանի մյուս անհետաձգելի պահանջի՝ ամբողջ ԵՄ-ում Թուրքիայի քաղաքացիների առանց վիզայի ռեժիմի համար անհրաժեշտ կոնսենսուսը հազիվ թե իրականացվի:
Էրդողանը կարող էր այս կետի հետաձգմանը համաձայնվել, դրանից զատ՝ նա մանեւրելու շատ տարածք չունի: Նախագահի քաղաքական դիրքերը վերջին շրջանում սասանվել են. նրա «Արդարություն եւ զարգացում» կուսակցությունն անցյալ տարի անցկացված ՏԻՄ ընտրությունների ժամանակ խոշոր քաղաքների մեծ մասում պարտվել էր, իսկ նախկին համախոհները քաղաքական կուսակցություններ են ստեղծում՝ նրան մարտահրավեր նետելու համար: Միջազգային ասպարեզում նրա հավակնությունները անհաջողություն կրեցին Սիրիայում: Չնայած ազգայնական փոշուն, Պուտինի հետ հրադադարի համաձայնագիրը խոցելի է դարձրել թուրքական շատ դիրքեր:
Էրդողանը հուսահատորեն քաղաքական հաղթանակի կարիք ունի, իսկ եվրոպացիներ մեծ մասը հուսահատորեն ցանկանում է փախստականներին իր սահմաններից հեռու պահել:
Այնպես որ, ատամները կրճտացնելով՝ եվրոպացիները իրենցից կքամեն լրացուցիչ օգնությունը, որը ցանկանում է Էրդողանը»: