Նազարբաեւի դստերն ու թոռանը պարտավորեցրել են ապացուցել ավելի քան 100 մլն դոլարի օրինական ծագումը
Պարզվել է, որ Լոնդոնում շքեղ անշարժ գույքը, որի վրա անցյալ տարի կալանք էր դրվել որպես «չհիմնավորված հարստություն», ղազախ առաջնորդ Նուրսուլթան Նազարբաեւի դստեր եւ թոռան սեփականությունն է: Նրանց պարտավորեցրել են ապացուցել ավելի քան 100 մլն դոլարի օրինական ծագումը, որով բրիտանական մայրաքաղաքի պերճաշուք շրջաններում գնվել են 2 առանձնատներ եւ շքեղ բնակարաններ, փոխանցում է BBC-ն:
Երկրի ամենաթանկարժեք փողոցներից Բիշոփս ավենյուում լավ պահպանվող առանձնատունը՝ ստորգետնյա լողավազանով եւ կինոթատրոնով, Հայգեյթ հեղինակավոր շրջանում տունը եւ Չելսիում ահռելի բնակարանը կալանավորվել էին անցյալ տարվա գարնանը բրիտանական իրավապահ մարմինների հայցի հիման վրա: Իշխանություններն այդ ժամանակ հայտնել էին, որ անշարժ գույքը կապ ունի քաղաքական նշանակալի դեմքի հետ, բայց չէին հայտնել ո՛չ հասցեներ, ո՛չ անուններ:
Լոնդոնի Գերագույն դատարանի դատավորը երեքշաբթի թույլ է տվել այդ տեղեկությունները հրապարակայնացնել՝ չընդունելով սեփականատերերի առարկությունները: Պարզվում է՝ սեփականատերերն են Ղազախստանի Սենատի խոսնակ եւ Նուրսուլթան Նազարբաեւի դուստր Դարիգա Նազարբաեւան եւ նրա ավագ որդի Նուրալի Ալիեւը կնոջ՝ Աիդայի հետ: Նրանք դատարանում վիճարկում են իրենց անշարժ գույքի վրա դրված կալանքը, որն ավելի քան 100 մլն դոլարով գնվել էր մի քանի տարի առաջ: Դրա ընթացիկ շուկայական արժեքը կարող է շատ ավելին լինել:
Կալանքը նոր արշավի առաձին ակտերից մեկն է՝ ուղղված Բրիտանիայում տներ գնելու միջոցով կասկածելի կապիտալի լվացման դեմ պայքարին: Այս պայքարի գործիքը օրդերն է, որը թույլ է տալիս գույքը բռնագրավել, եթե տերը չի ապացուցում, որ այն արդար ճանապարհով է ձեռք բերել:
Այդպիսի առաջին օրդեր է տրվել դեռեւս 2018 թվականին Ադրբեջանից պետական բանկիրի կնոջը, որը հայրենիքում դատապարտվել էր յուրացման համար: Կինն այն վիճարկել էր, եւ միայն վերջերս է դատարանը դրել դեբյուտային գործի վերջակետը: Դատարանը մերժել է Զամիրա Հաջիեւայի առարկությունները եւ այդպիսով վերացրել վերջին խոչընդոտը, որ օրենքը գործի ամբողջ ուժով, իսկ հակալվացման արշավը նոր մակարդակի է դուրս եկել:
Եվ ահա մինչեւ դատարան է հասել երկրորդ գործը:
Անշարժ գույքը ձեւակերպվել է երեք օֆշորում, որոնք գրանցված են Նիդեռլանդական Անթիլյան կղզիներում, Պանամայում եւ բրիտանական անդրծովյան Անգիլիա տարածքում: Հանցավորության դեմ պայքարի ազգային գործակալության (NCA) քննիչների կարծիքով՝ տները գնվել են Նուրալի Ալիեւի հոր եւ Դարիգա Նազարբաեւայի նախկին ամուսնու՝ Ռահաթ Ալիեւի հանցավոր եկամուտներով:
Նազարբաեւի երբեմնի ազդեցիկ, իսկ ներկայումս հանգուցյալ փեսան շնորհազրկվել էր 2000-ականների սկզբին, երկրից հեռացել էր, հեռակա դատապարտվել, Ավստրիայում կալանավորվել եւ արդյունքում 2015 թվականին մահացած էր հայտնաբերվել բանտային խցում:
2014 թվականին լողավազանով առանձնատունը գնելու պահին Նուրալին դեռեւս 30 տարեկան չկար, բայց արդեն հասցրել էր ղեկավար պաշտոններում աշխատել ղազախական բանկերում եւ ընկերություններում: 2014 թվականի վերջին նա պետական ծառայության էր անցել եւ 2 տարի զբաղեցրել մայրաքաղաքի փոխքաղաքապետի պաշտոնը:
Այս ընթացքում նրա հայրը ավստրիական բանտում դատի էր սպասում՝ 2 բանկիրների սպանության մեղադրանքով: Նա Դարիգայից ամուսնալուծվել էր 2007 թվականին, ուստի չի կարող կապ ունենալ լոնդոնյան անշարժ գույքի հետ, որը գնվել է 2008 թվականից հետո՝ դատարանում պնդել է կալանավորված կացարանների սեփականատերերին ներկայացնող փաստաբանը:
Նա ասել է, որ գործը հիմնազուրկ է, եւ քննիչներին մեղադրել է «աշխարհի մասին անհեթեթորեն նահապետական պատկերացումներ» ունենալու մեջ. Նազարբաեւան ինքնուրույն կին է եւ կարող է ինքը վաստակել:
Փաստաբանների եւ ընտանիքի խոսքով՝ իրենք NCA են ներկայացրել բոլոր փաստաթղթերն այն մասին, թե ինչպես է Նազարբաեւան կառավարում իր փողերը եւ ինչպես է կազմակերպվում անշարժ գույքի ձեռքբերումը՝ հարկման օպտիմալացման նպատակով: