Տոտալ նավթային պատերազմը «աննախադեպ» իրավիճակ է ստեղծել էներգետիկ շուկաներում
Տոտալ նավթային պատերազմը «աննախադեպ» իրավիճակ է ստեղծել էներգետիկ շուկաներում, հայտնում է CNBC-ը՝ հղում կատարելով վերլուծաբաններին։ Թրեյդերներն անհամբերությամբ սպասում են, թե նավթի համաշխարհային խոշորագույն արտադրողներից ով առաջինն «աչքերը կթարթի»։
Անցյալ շաբաթվա վերջում ՕՊԵԿ+-ի երկրները չկարողացան պայմանավորվել նավթի մատակարարումների կրճատման շուրջ։ Սաուդյան Արաբիայի եւ Ռուսաստանի միջեւ տարաձայնությունները նավթի գների պատերազմի սկիզբը դրեցին։
«Կարճ ժամանակահատվածում մենք նավթի պահանջարկի ցնցում ենք ապրում կորոնավիրուսի, այնուհետեւ ՕՊԵԿ-ի պատճառով»,- հայտարարել է JBC Energy Group-ի հիմնադիր եւ նախագահ Յոհաննես Բենինին։
«Ես նկատի ունեմ, որ սա պարզապես ցնցող է, մենք պատմություն ենք կերտում։ Սա կարելի է անվանել համաշխարհային նավթային պատերազմ։ Բանն այն չէ, որ իրականում Սաուդյան Արաբիան ուժով չափվում է Ռուսաստանի հետ, ինչի մասին բոլորն են խոսում։ Նրանք կարող են անել դա, սակայն Ռուսաստանը միշտ ասել է, որ ուզում է մի քիչ ավելի շատ դիրքեր վերցնել թերթաքարային արդյունաբերության մեջ։ Սաուդյան Արաբիան փաստացի պատերազմ է հայտարարում, եւ նրանք գերազանցում են ռուսներին ամերիկյան թերթաքարերին պատերազմի հայտարարություններում»,- ասել է Բենինին։
Շաբաթ օրը Սաուդյան Արաբիան հայտարարեց նավթի զգալի զեղչերի մասին։ Նավթով հարուստ թագավորությունը պատրաստվում է մեծացնել արդյունահանումը օրական 10 միլիոն բարելից ավելի։ Ներկայում Էր Ռիադը օրական 9,7 մլն բարել է արդյունահանում, սակայն նա ունակ է այն մեծացնել մինչեւ օրական 12,5 բարելի։
Գների իջեցման մասին Սաուդյան Արաբիայի որոշումն ընդունվել է Վիեննայում ՕՊԵԿ-ի գրասենյակում Ռուսաստանի հետ բանակցությունների խափանվելուց 24 ժամ էլ չանցած։
Հինգշաբթի օրը ՕՊԵԿ-ը խորհուրդ էր տվել նավթի արդյունահանումը ապրիլից սկսած մինչեւ տարվա վերջը լրացուցիչ կրճատել մինչեւ օրական 1,5 մլն բարել։ Սակայն Ռուսաստանը մերժել էր այդ առաջարկությունը։ Հեռանալով նիստից՝ ՌԴ էներգետիկայի նախարար Ալեքսանդր Նովակը լրագրողներին հայտնել էր, որ դա չի նշանակում, թե ՕՊԵԿ+-ի արտադրողները կարող են այնքան նավթ հանել, որքան ուզում են։
S & P Global Platts-ի գլոբալ վերլուծության բաժնի ղեկավար Քրիս Միդգլին ասել է, թե «աննախադեպ պայմանները» ստեղծել են մի իրավիճակ, երբ նավթային թրեյդերները ստիպված են սպասել, թե որ արտադրողն առաջինը «աչքերը կթարթի»։
«Ռուսաստանի արժույթը ճկուն է, այն դեպքում, երբ Սաուդյան Արաբիայի ռիալը կապված է ԱՄՆ դոլարի հետ»,- ասել է Macro-Advisor-ի ներկայացուցիչ Քրիս Ուիֆերը՝ հավելելեով․ «Դա նշանակում է, որ Մոսկվան հազիվ թե առաջինը թարթի։ Երկու երկրների գլխավոր նպատակը կարող են լինել ԱՄՆ-ում թերթաքարի մարժինալ արտադրողները»,- ասել է Ուիֆերը։
Կատարվող իրադարձությունները հիշեցնում են 2014թ․, երբ Սաուդյան Արաբիան, Ռուսաստանը եւ ԱՄՆ-ը պայքարում էին նավթային արդյունաբերության շուկայում մասնաբաժնի համար։ Արտադրության աճին զուգահեռ գները կտրուկ իջնում էին, եւ որոշ վերլուծաբաններ կարծում են, որ գները վերադառնում են այդ մինիմումներին։
Ինչպես հայտարարել է ADS Investment Solutions-ի գլխավոր գործադիր տնօրեն Ռայան Լիմանդը, Պարսից ծոցի երկրների համագործակցության խորհուրդը արտասահմանյան արժույթի «էական» պաշարներ ունի, ինչը Մերձավոր Արեւելքի երկրներին առավելություն է տալիս նրանում, ինչը վերաբերում է նավթի ցածր գների ժամանակահատվածին։ «Ես կարծում եմ՝ Ռուսաստանը սրան երկար չի դիմանա, եւ ես կարծում եմ, որ Ռուսաստանը կվերադառնա ՕՊԵԿ+, ինչպես դա տեղի ունեցավ մի քանի տարի առաջ»,- ասել է Լիմանդը։