«Նոր» Հայաստանը վտանգավոր խաղի կանոն է փաթաթում հասարակությանը
«Նոր» Հայաստանում, «դուխովների» եւ «հպարտների» ղեկավարած երկրում մեզնից յուրաքանչյուրը դարձել է անպաշտպան եւ խոցելի: Ամենակարեւորը, անպաշտպան եւ խոցելի է դարձել մեզնից յուրաքանչյուրի ընտանիքի անդամը, երեխան, սանիկը, հայրը եւ մայրը:
ՍԴ նախագահի վրա ճնշում գործադրելու համար հայտնվում են նրա հայրական տան տանիքում, երեխաներին կանչում ԱԱԾ հարցաքննության, ճնշում գործադրում որդու մարզչի վրա, որ նրան պատանիների ֆուտբոլի թիմից հեռացնեն, կալանավորում են սանիկին...
Ցավոք, այս օրինակները կարելի է երկար շարունակել: Մեզ փաթաթվել է խաղի կեղտոտ եւ վտանգավոր կանոն: Ներխուժում են տուն, այս ամենին խառնում ընտանիքի անդամներին, երեխաներին: Իսկ այն, ինչ տեղի ունեցավ մարտի 4-ի լույս 5-ի գիշերը, ժամը 2-3-ի սահմաններում Երեւանում, ընդամենն այսօրվա խորհրդանշական պատկերն է:
Հարյուրավոր ոստիկաններ, մի մասը՝ դիմակավորված, ներխուժել են «Վստրեչի Ապեր» մականունով հայտնի Արամ Վարդանյանի առանձնատուն եւ դրան հարակից այլ տներ ու վայրագություններ արել։ Կոտրել են տան դռները, պատուհանները։ Մտել են սենյակներ, տակնուվրա արել ամեն ինչ, քաշքշել Արամ Վարդանյանի մորը, ընտանիքի այլ անդամների, վախեցրել նրա հնգամյա թոռնուհուն, որը վախից կորցրել է խոսելու ունակությունը եւ տեղափոխվել հիվանդանոց։ Այնուհետեւ բերման են ենթարկել Վարդանյանի եղբորորդուն, այլ անձանց, նաեւ հարակից բնակարաններից, որոնք այս կամ այն կերպ փոխկապակցված են Արամ Վարդանյանի հետ։
Այսօր առանց որեւէ օրինական հիմքի մտել են Արամ Վարդանյանի տուն, վաղը կմտնեն ՀՀ ցանկացած քաղաքացու տուն: Ոստիկանները ոչ թե ինչ-որ քրեական գործի շրջանակներում գործողություն են կատարել, այլ հարվածել են մեր հասարակության մեջքին, մեր պետության մեջքին:
Փաստաբան Լուսինե Սահակյանը փորձել է պարզաբանում ստանալ ոստիկաններից, այդ թվում՝ ներխուժման գործողությունն անձամբ տեղում համակարգող Էրեբունու ոստիկանապետից, սակայն նրան որեւէ բացատրություն, բնականաբար, չի տրվել: Իսկ ի՞նչ բացատրություն պետք է տային: Ի դեպ, ոստիկանների հեռանալուց հետո պարզվել է, որ տնից բացակայում են Վստրեչի Ապերի ոսկյա շղթան եւ օծանելիքը, գումար։
Հիմա ոմանք կշտապեն ասել, թե Վստրեչի Ապերից քաղհալածյալ ենք սարքում, եւ որ ամեն ինչ քաղաքականացնում ենք: Կասեն, թե ի՞նչ գործ ունենք խառնվել քրեական գործի շրջանակներում կատարված գործողության հետ: Բայց եթե չխառնվենք, գնահատական չտանք տեղի ունեցած վայրագություններին, չդատապարտենք հնգամյա երեխային սարսափի հասցրածներին, ապա վաղը նույն այդ ոստիկանները կներխուժեն մեզնից յուրաքանչյուրի տուն, կքաշքշեն նաեւ մեր մորն ու կնոջը, կվախեցնեն մեր հինգամյա երեխային:
Ի դեպ, լրատվամիջոցներից մեկին այն, ինչ ասել է նույն Արամ Վարդանյանը, պետք է արժանանա ՀՀ յուրաքանչյուր քաղաքացու ուշադրությանը՝ համապատասխան եզրահանգումներ անելու համար: Այսպես, նա ասել է, որ երկու ամիս ինքը երկրում չի եղել, եւ այդ ընթացքում իրեն զանգահարել է ինչ-որ «իքս» անձ եւ գործարք առաջարկել։ Գործարքը հետեւյալն է եղել՝ նրան պետք է «փռեին ասֆալտին»։
Արամ Վարդանյանը եկել է Հայաստան, բայց գործարքին, ի վերջո, չի համաձայնել: Պատասխանը եղել է այսպիսին: Թատրոն, վատ բեմականացված թատրոն: Ի՞նչ սպասես, ակնկալես մի իշխանությունից, որտեղ «ասֆալտին փռելն» արվում է բացառապես հասարակության մի շերտի մոտ կառավարության վարկանիշը բարձրացնելու համար:
Արամ Վարդանյանը զարմացած է, ապշած: Նա լրագրողներին պատմել է, որ տարիներ առաջ գործուն օգնություն է ցուցաբերել, թե Նիկոլ Փաշինյանի ընտանիքին, թե այժմ պատգամավոր Հայկ Գեւորգյանին, նպաստելով նրանց ընտանիքիների անդորրին եւ անվտանգությանը: Պատմում է զարմացած, որ այսպիսի պատասխան է ստացել:
Սա հենց «նոր» Հայաստանում հաստատված խաղի կեղտոտ եւ վտանգավոր կանոններից մեկն է: Ուզո՞ւմ եք, որ այս կեղտոտ բարքերը խորանան, ուզո՞ւմ եք, որ ինչ-որ մեկի վարկանիշի բարձրացման կամ էլ ինչ-որ բանի համար ձեզ, ձեր հարեւաններին, ընկերներին թատերական ներկայացման համար պառկացնեն ասֆալտին, ներխուժեն տուն եւ հինգ տարեկան երեխաներին սարսափի մատնեն, ապա ժպտալով մասնակցեք ապօրինաբար նշանակված հանրաքվեին:
Վստահ եղեք, որ այս իշխանությունների նախաձեռնած հանրաքվեին ՈՉ ասելը ՈՉ կնշանակի նաեւ այս կեղտոտ եւ երկիր մաշող բարքերին, ՈՉ կնշանակի անհասկանալի եւ անտրամաբանական գործողումներին, պարգեւավճարներին ...
Վարդան Մխիթարյան
Top-News.am