Լուվրում դա Վինչիի մահվան 500-ամյա տարելիցին նվիրված ցուցադրությունն այցելությունների ռեկորդ է գրանցել

 Փարիզի Լուվր թանգարանից հայտնել են, որ ռեկորդային թվով մարդիկ (մոտ 1.1 մլն) են այցելել՝ տեսնելու Լեոնարդո դա Վինչիի ցուցադրությունը, որը փակվելու է երկուշաբթի:

Ինչպես փոխանցում է France24-ը, ցուցահանդեսը, որը նվիրված է Վերածննդի դարաշրջանի մեծագույն հանճարի մահվան 500-ամյա տարելիցին, երկու անգամ ավելի շատ այցելուների է գրավել՝ աշխարհի ամենից շատ այցելություններ ունեցող թանգարանի նախորդ մեծ ցուցադրության համեմատ:

2018թ. 540 000 մարդ էր այցելել թանգարան՝ տեսնելու 19-րդ դարի ֆրանսիացի նկարիչ Էժեն Դելակրուայի հետահայաց ցուցադրությունը:

Դա Վինչիի աշխատությունները, որոնք ներկայացվել էին Լուվրի անգերազանցելի հավաքածուից, տեսնելու համար ռեկորդային թվով մարդիկ նախապես էին տոմսեր ձեռք բերել:

Ի դեպ, նշվում է, որ «Մոնա Լիզան» բացակայել է ցուցադրությունից, քանի որ կազմակերպիչները վախենում էին մարդկանց բազմությունը վերահսկելու խնդրի առաջ կանգնելուց:

Սակայն «Չքնաղ Ֆերոնիերան» և «Հովհաննես Մկրտիչը» կտավները 120 գործերի շարքում էին, որոնք ներկայացվել են հոկտեմբերին բացված ցուցահանդեսի ժամանակ: