2019 թվականին շատ հարուստ մարդկանց թիվն ավելացել է 10 տոկոսով

Շատ հարուստ մարդկանց (very high net worth, VHNW) թիվը 2019 թվականին ավելացել է 10 տոկոսով եւ հասել է 2,7 միլիոնի, վկայում են Wealth-X վերլուծական ընկերության տվյալները, հայտնում է ՌԻԱ Նովոստին։

«Շատ հարուստ մարդկանց թիվը, ում կարողությունը գնահատվում է 5-30 մլն դոլար, 2019թ․ բավական՝ մոտ 10 տոկոսով աճել է»,- նշվում է հետազոտության մեջ։

Նրանց կարողության ընդհանուր արժեքը նույնպես աճել է 10 տոկոսով եւ հասել է 26,6 տրլն դոլարի։ Բացի այդ, ընկերությունը ուշադրություն է դարձնում, որ 2018թ․ այս ցուցանիշը միայն 1 տոկոսով էր ավելացել։

Շատ հարուստ մարդկանց թվի աճով առաջատարը Հյուսիսային Ամերիկան է։ Հետազոտության համաձայն, նրանց կարողության ընդհանուր չափը մեծացել է մոտ 15 տոկոսով։

Ակտիվ աճ է գրանցվել նաեւ Ասիայում եւ Աֆրիկայում։ Եվրոպայում եւ Խաղաղօվկիանոսյան տարածաշրջանում դիտարկվել է ավելի քիչ աճ, սակայն ավելի շատ, քան Մերձավոր Արեւելքում։ Լատինական Ամերիկայում եւ Կարիբյան ավազանի երկրներում բարեկեցության աճ չի նկատվել։ Բոլոր նրանց, ում կարողությունը գերազանցում է 30 միլիոնը, ընկերությունն անվանում է «ուլտրահարուստ մարդ»։

Wealth-X-ը զբաղվում է ամենահարուստ մարդկանց շրջանում հետազոտություններով։ Ընկերությունը հիմնադրվել է 2010թ․ եւ գրասենյակներ ունի Հյուսիսային Ամերիկայում, Եվրոպայում ու Ասիայում։