Ինքնաթիռի ուղևորը սկսել է ծամել սեփական հեռախոսը և խափանել է դեպի Իսլանդիա չվերթը
Easy Jet ավիաընկերության ուղևորներից մեկն ինքնաթիռում չափից շատ ջին է խմել և սկսել է ծամել իր հեռախոսը, ինչի արդյունքում օդաչուները ստիպված են եղել փոխել երթուղին: Այս մասին տեղեկացնում է dailymail.com կայքը:
44-ամյա Մեթյու Ֆլաերթին Անգլիայից պետք է մեկներ Իսլանդիա, սակայն խափանել է թռիչքն իր անադեկվատ պահվածքի պատճառով: Սկզբում նա սկսել է վիրավորել բորտուղեկցորդներին ու սպառնացել է սպանել նրանց, հետո սկսել է ծամծմել իր հեռախոսը:
Բորտուղեկցորդների խոսքով` իրենք անհանգստացել են ստեղծված իրավիճակից և վախեցել, որ ուղևորը կվնասի իրենց:
Ուղեկցորդները տեսել են, թե ինչպես է Ֆլաերթին հանել հեռախոսը և սկսել քանդել այն` ընթացքում վնասելով իրեն, ինչից հետո հեռախոսի մասերը դրել է բերանը, իսկ մարտկոցը նետել նստարանին: Մարտկոցը սկսել է ծխալ:
Ինքնաթիռի գլխավոր օդաչուն որոշել է ուղղությունը փոխել դեպի Էդինբուրգի օդանավակայան, որտեղ ոստիկանները Ֆլայերթին ինքնաթիռից բերման են ենթարկել ոստիկանության բաժանմունք:
Դատարանում ուղևորն ընդունել է մեղքը` թռիչքի անվտանգությանը սպառնալու մասով: Նրա դատավճիռը կկայացվի մարտին: