«Այսօրվա իշխանությունը չի ցանկանում, որպեսզի իր կոշիկի տակ, ինչ որ մի դատարան լինի». Լեւոն Բաղդասարյան
Ասել, որ մենք Սահմանադրական դատարան չենք ունեցել եւ եղել է մի ամորֆ մարմին, որը չգիտես ինչու տարփողում է այսօրվա իշխանությունը, կարծում եմ դա այդպես չէ։ Այս մասին այսօր փետրվարի 10–ին, լրագրողների հետ հանդիպման ժամանակ ասաց փաստաբան Լեւոն Բաղդասարյանն՝ անդրադառնալով ՍԴ–ի շուրջ ստեղծված զարգացումներին։
«ՍԴ–ն մեր երկրում կայացած մարմին է եղել եւ բավականին մեծ գործառույթներ է իրականացրել։ ցավոք նախորդ բոլոր իշխանությունների օրոք ՍԴ–ն արդարադատությունը թերի է իրականացրել»,-ասաց նա:
Փաստաբանի խոսքով, եւ առաջին նախագահի, եւ երկրորդ նախագահի, եւ երրորդ նախագահի օրոք, երբ տեղի էին ունենում համապետակյան ընտրություններ եւ շահագրգիռ անձինք ՍԴ–ում վիճարկում էին ընտրությունների արդյունքները, ժողովրդի որոշ զանգված տեսնելով այն անօրինականությունները ընտրությունների հետ կապված, որ տեղի էին ունենում երկրում, հույս ուներ, որ ՍԴ–ն սահմանադրական արդարադատություն կիրականացնի. «Ցավոք ՍԴ–ն լավագույն դեպքում կիսարդի արդարադատություն է իրականացրել եւ արդյունքում մենք ունեցել ենք, ոչ իրավաչափ ակտեր։ Սահմանադրական դատարանը, ինչպես դատական իշխանությունը եւս եղել է գործադիրի կոշիկի տակ, այսինքն անկախ չի եղել»,– ասաց Բաղդասարյանը։
Նրա խոսքով՝ դա է պատճառը, որ այսօրվա լեգիտիմ իշխանությունը ցանկություն ունի, որպեսզի այն փոխվի. «Պետք է փաստել, որ այսօրվա իշխանությունը չի ցանկանում, որպեսզի իր կոշիկի տակ, ինչ որ մի դատարան լինի եւ դա է պատճառը, որ քաղաքական որոշման արդյունքում որոշում են կայացրել, որ պետք է հանրաքվել լինի։ Ես, որպես իրավապաշտպան դա ողջունում եմ եւ այստեղ կարեւորում եմ, որ ՍԴ–ի դատավորները, անդամներն, իրենց վերաբերմունքը հայտնեն, այսպես կրավորական կեցվածքով ձայն չհանելը, որովհետեւ իրենց իրավունք–պարտականությունների հետ կապված քաղաքական որոշում է կայացվել»։
Բաղդասարյանի խոսքով՝ երկրում 2 տարի առաջ նոր քաղաքականության հիմք է դրվել. «Քաղաքացին որոշեց, որ այսուհետ պետք է ապրի օրինապաշտ, այսինքն նորմալ խաղի կանոններով պետք է իր գործառույթներն իրականացնի եւ այդ գաղափարների կրողը, որը գցեց ժողովրդի առաջ, դա եղել է Նիկոլ Փաշինյանը, թե որքանով նա կիրականացնի դա, այլ խնդիր է, բայց որ անուրանալի է վերջինիս կատարած գործառույթը ընտրությունների հետ կապված, դա մենք պետք է ամրագրենք եւ դրա հիմման վրա պետք է շարունակենք մեր գործառույթները»։
Նրա խոսքով՝ հեղափոխությունից անմիջապես հետո պետք է փոխվեր Սահմանադրությունը։
«Նախ Սահմանադրություն, որի հիման վրա եղավ հեղափոխությունը, այսինքն Սահմանադրություն, որն ըստ էության կարվեց երրորդ նախագահի համար եւ այդ հիմքով մերժվեց երրորդ նախագահը, եկավ նոր իշխանություն եւ չգիտես ինչու նոր իշխանությանը դուր եկավ այդ Սահմանադրությունը եւ դրա հետեւանքների բացասական կրողն այսօրվա իշխանությունն է։ Լավ է ուշ, քան թե ուշացած։ Եթե իշխանությունը գտնում է, որ փոփոխություն պետք է լինի եւ քաղաքական որոշում է կայացնում, ես կարծում եմ, որ դա ընդամենը պետք է ողջունել»,– ասաց Բաղդասարյանը։