Համոզմունք ունեմ, որ հանրաքվե իրականում տեղի չի ունենալու․ Արսեն Բաբայան
Ես համոզմունք ունեմ, որ հանրաքվե իրականում տեղի չի ունենալու։ Այս մասին NEWS.am-ի հետ զրույցում ասաց ԱԺ աշխատակազմի ղեկավարի նախկին տեղակալ Արսեն Բաբայանը։
Նա շեշտեց՝ Սահմանադրական փոփոխությունների նախագիծը օրակարգ բերելուց մինչև ՀՀ նախագահին ուղարկելն ընթացակարգային խախտումներով են ուղեկցվել․ «Ընթացակարգային լուրջ խախտումներ էին առկա այդ հարցը օրակարգ բերելուց մինչև ՀՀ նախագահին ուղարկելու գործընթացում։ Սահմանադրական փոփոխություն ընդունելու հստակ կարգ կա․ նախևառաջ պետք է քվեարկվի և ընդունվի առաջին ընթերցմամբ, ապա պետք է դրվի երկրորդ ընթերցման և ուղարկվի Սահմանադրական դատարան, որի դրական եզրակացությունը ստանալուց հետո պետք է տեղի ունենա երկրորդ ընթերցման քվեարկությունը։ Եվ եթե երկրորդ ընթերցմամբ ԱԺ հավանությանն արժանան, այսինքն՝ ստանա 88 ձայն, ապա այն կուղարկվի նախագահին, կստորագրվի և կմտնի ուժի մեջ, եթե երկրորդ ընթերցմամբ չստանա ԱԺ հավանությունը, ապա ԱԺ-ն իրավունք է ստանում այդ փոփոխությունը հանրաքվեի դնել, կրկին քվերակությամբ՝ ԱԺ-ն որոշում է ընդունում հանրաքվե նշանակելու մասին, այս անգամ անհրաժեշտ է պատգամավորների ընդհանուր թվի 3/5-ը։ Իսկ եթե նախագիծն առաջին ընթերցմամբ չի ընդունվում, արդեն դուրս է գալիս, գոյություն չունի, իսկ գործող իշխանությունը հակապետական մեկնաբանություն տվեց գործող սահմանադրական և օրենսդրական նորմերին, համարեցին, որ եթե առաջին ընթերցմամբ չհավաքի անհրաժեշտ ձայները, ապա կարելի է դնել հանրաքվեի։ Սա տարօրինակ մեկնաբանություն է, որ արել են և փորձում են այդ ճանապարհով գնալ առաջ»։
Բաբայանը հավելեց՝ անցումային դրույթը փոխելը, երբ այն իր գործառույթը կատարել է, ծիծաղելի է․ «Անցումային դրույթների ամբողջ գաղափարն այն է, որ այն անցում է նախատեսում, այսինքն ինչ-որ ֆունկցիա է կատարում, որից հետո անցնում-գնում է, էլ իմաստ չունի, իշխանություն չունի։ Մասնավորապես, Սահմանադրության 213-րդ հոդվածը սկսվել և ավարտվել է 1 օր՝ հանրապետության նախագահի երդմնակալության օրը։ Այսինքն այդ օրն ինքը կատարել է իր ֆունկցիան, ՍԴ նախկին անդամներին դարձրել է դատավոր, այդ պահից այդ հոդվածի գործառույթը վերացել է, և եթե մենք ուզում ենք 213-րդ հոդվածը վերացնել, ուժը կորցրած ճանաչենք կամ փոխենք, մենք պետք է ունենանք ժամանակի մեքենա, վերադառնանք նախագահի երդմնակալությունից առաջ, նոր միայն փոփոխենք, բայց արդեն իր գործառույթն ավարտած հոդվածը գոյություն չունի, ծիծաղելի է այդ հոդվածում կատարել փոփոխություն»։
Խոսելով նախագիծը հանրաքվեի դնելու նպատակի մասին՝ Բաբայանը մեջբերեց ԱԺ-ում ՀՀ վարչապետի ելույթը․ «Վարչապետն իր ելույթում ասաց, որ հարգելի դատավորներ, դուք շատ լավ գիտեք, որ դեռ գործում է վաղաժամ կենսաթոշակի անցնելու օրենքը, ուրեմն օգտվեք այդ օրենքից, որովհետև եթե չօգտվեք, մենք ձեզ գործից հանելու ենք, ձեր լիազորությունները դադարեցնելու ենք։ Այսինքն՝ ակնհայտ է դառնում, որ նպատակն է ճնշել ՍԴ դատավորներին, ստիպել, որ «կամավորությամբ» ընտրեն վաղ կենսաթոշակի գնալու ճանապարհը։ Սա հայտարարել է վարչապետը ԱԺ ամբիոնից, սրա մասին խոսում է քաղաքական իշխանությունը, սրա մասին էլ դեռ տարբեր կոչեր են հնչում, այդ է պատճառը, որ ես համոզմունք ունեմ, որ հանրաքվե իրականում տեղի չի ունենալու։ Իմ համոզմամբ՝ իշխանությունը հենց սկզբից նպատակ չի ունեցել, որ այդ հանրաքվեն տեղի ունենա»։
Նա նաև վստահ է՝ ժամանակահատվածը սահմանադրական փոփոխության համար պատահական չի ընտրված․
«Ես վստահ եմ, որ դիտավորյալ է արվում հենց այս ժամանակահատվածում, սրանով ևս մեկ անգամ ճնշում է գործադրվում ՍԴ-ի նկատմամբ, սա ուժի կիրառում է, որը հակասում է Վենետիկի հանձնաժողովի երկու հիմնական առաջարկ-մտահոգությանը վաղ կենսաթոշակի նախագծի հետ կապված՝ նախ որ կապված չլինի դատավորների գործերի հետ և չառաջացնի ճգնաժամ ՍԴ-ում և որ պահպանվի բացառապես կամավորության սկզբունքը։ Մենք տեսնում ենք, որ այդ երկու առաջարկն էլ խախտված են։ Մասնավորապես, օրենքի ընդունմամբ ստեղծվել է հնարավորություն, որ եթե հանկարծ մեծամասնությունը հրաժարական տա, ապա պետությունը պարտավոր է դա ընդունել և նրանց ցմահ թոշակ նշանակել, իսկ այդ դեպքում կունենանք ճգնաժամ, քանի որ ՍԴ-ն չի կարող գործել մինչև նոր դատավորների նշանակումը, երկրորդ՝ երբ ասում են, որ պետք է լինի բացառապես կամավորության հիման վրա, այս ընթացքում տեսնում ենք, որ տարբեր ճնշումներ իրականացվեցին, քրեական գործեր հարուցվեցին, սանիկներ կալանավորվեցին, դատավորներին գաղտնալսեցին, նրանց ընտանիքների վերաբերյալ տեղեկություններ հավաքվեցին, իսկ այսօր արդեն սահմանադարական փոփոխությամբ այդ ճնշումները հասան գագաթնակետին։ Ասվում է՝ դատավորներ, քանի ժամանակ ունեք, պարտավոր եք ընտրել վաղ կենսաթոշակը»։
Արսեն Բաբայանը կարծիք հայտնեց նաև, որ պետք է միջազգային կոշտ արձագանքի սպասել․ «Ես վստահ եմ՝ ԵԽԽՎ-ն և Վենետիկի հանձնաժողովը սա անպատասխան չեն թողելու, հատկապես հանրաքվեի նախագիծն ընդհանրապես չի ուղարկվել Վենետիկի հանձնաժողովի փորձաքննությանը։ Միաժամանակ, միջազգային հնարավոր կոշտ արձագանքը իշխանությանը չի վնասելու, վնասելու է Հայաստանի Հանրապետությանը։ Քանի որ իշխանություններն իրենց պարգևավճարները ստանում են, գործողումների մեկնում են, բայց ՀՀ վարկանիշը միջազգային մեր գործընկերների մոտ անկում է ապրելու։ Բավական է հիշել Լեհաստանի օրինակը, և ես վստահեցնում եմ, որ մենք Լեհաստանից ավելի վատ վիճակում ենք լինելու, որովհետև անցել ենք բոլոր սահմանները, քրեական գործեր ենք հարուցել, 7 հոգու համար փոփոխություններ ենք արել, սրանք աննախադեպ երևույթներ են, որ չեք հանդիպի որևէ ժողովրդավար երկրում»։
Նրան նաև մտահոգում է, որ հասարակությանը շեղելու փորձ է արվում սրանով․
«Հանրաքվեն հիմա փորձ է արվում ձևակերպել սևերի ու սպիտակների պայքար, փորձ է արվում վերադառնալ «Մերժիր Սերժին» կարգախոսին, հեղափոխության երկրորդ ալիք է ներկայացվում, այսինքն՝ իշխանության նպատակն է շեղել հանրությանը, որ մարդիկ մտածեն, թե սա հեղափոխության ևս մեկ ալիք է, որ պետք է իրականացվի, սակայն սա հեղափոխության հետ որևէ առնչություն չունի, սա ընդամենը անձնական ամբիցիաների խնդիր է, որ գործադիր իշխանության ղեկավարը երկրում հաստատի միապետոթյուն, որովհետև ակնհայտ է, որ ՍԴ մեծամասնությանը հեռացնելով և նոր մեծամասնություն նշանակելով բերվելու են վարչապետի տիրապետության տակ գտնվող անձինք։ Այս գործընթացը եթե իշխանությունների համար ցանկալի արդյունք տա, ապա կարող ենք արձանագրել Հայաստանի որպես իրավական պետության կորուստ»։
Մենք իրավունք չունենք նահանջելու և պարտավոր ենք մեր ջանքերն ամբողջությամբ գործադրել հանուն հզոր պետության և անվտանգ ապագայի. Արսեն Բաբայան
Մեր հոռոմցի դատախազը չի պատրաստվում արդյո՞ք ուսումնասիրել այս առանձնատունն ու դրա սեփականատիրոջը
Թուրք-ադրբեջանական ձեռագիրն է, թաքնվել կանանց ու երեխաների ետևում
Մյուս ուժային կառույցները եւս չեն մնալու այս դավաճանական իշխանության հետ
Անհնար է երեք անգամ շփոթել «չորս ամիս» և «փետրվար» եղելությունը