Իսրայելում խուրմայի 2000 տարվա սերմերից արմավենիներ են աճեցրել
Իսրայելի հարավում քարանձավներում մոտ 2000 տարի մնացած սերմերը գիտնականների կողմից օգտագործվել են արմավենիներ աճեցնելու համար։ «Խադասա» բժշկական կենտրոնից Սառա Սալոնի կողմից ղեկավարվող հազվագյուտ նախագծի մասին գրել է Planet- today-ը՝ հղում կատարելով Science Alert-ին։
Ամեն ինչ սկսվել է երկու հազար տարեկան սերմերի հայտնաբերումից։ Մի քանի հարյուր սերմերից, որոնք հետազոտողները գտել են Մեռյալ ծովի եւ Հրեական բլուրների միջեւ քարանձավներում, աճեցնելու համար պիտանի են եղել ընդամենը տասներեքը։ Սակայն այդ քանակը բավարարել է, որպեսզի մի քանի փյունիկյան արմավենի աճեցնեն։
Խուրման, ինչպես նշում է Սալոնը, եղել է ոչ միայն կարեւոր սննդամթերք հին իսրայելցիների համար, այլեւ օգտագործվել է բժշկական պրակտիկայում։ Դրանով բուժել են, օրինակ, դեպրեսիան, հիշողության հետ կապված խնդիրները։ «Արմավենիները եղել են կարեւոր արտահանվող ապրանք, դրանք ամբողջ աշխարհում են աճել»,- ասել է գիտնականը։