Ռուսաստանը կարձագանքի Եվրոպայում ՆԱՏՕ-ի Defender-2020 վարժանքներին․ Լավրով
Ռուսաստանի ԱԳՆ ղեկավար Սերգեյ Լավրովը «Ռոսիյսկայա գազետա»-ին տված հարցազրույցում հայտարարել է, որ Ռուսաստանը կարձագանքի Եվրոպակում ՆԱՏՕ-ի Defender-2020 վարժանքներին, որոնք պլանավորված են մայիս-հունիս ամիսներին։
«Եվրամիության հետ ՆԱՏՕ-ի ռազմական համագործակցության համատեքստում հորինել են «ռազմական շենգեն» եզրույթը, որը ենթադրում է բոլոր տրանսպորտային զարկերակների արդիականացում, ընդհուպ ՆԱՏՕ-ի սահման, որպեսզի ցանկացած ռազմական տեխնիկա, այդ թվում՝ ամենախոշորը, կարողանա անխոչընդոտ անցնել Արեւելք։ Ես կարծում եմ, որ միայն այդ փաստը բավական է հասկանալու համար նման խաղերի վտանգավորությունը»,- նշել է Ռուսաստանի արտգործնախարարը։
Լավրովի խոսքերով՝ Defender-2020 վարժանքները, որոնց պատրաստումն արդեն վաղուց սկսվել է, ենթադրում են ավելի քան 30 000 միավոր ամերիկյան ռազմական տեխնիկայի ներգրավում ի լրումն նրա, որ ամերիկացիներն ու եվրոպացիները այստեղ արդեն ունեն, ի լրումն այստեղ տեղակայված ռազմական պաշարների եւ ակտիվների։ Ինչպես նաեւ՝ նախատեսվում է ավելի քան 20 000 ամերիկյան զինծառայողների փոխադրում։
ՌԴ ԱԳ նախարարը տեղեկացրել է, որ ձեւականորեն վարժանքները հայտարարված են որպես ամերիկյան, սակայն ՆԱՏՕ-ի դաշնակիցներին հրավիրելով։
Նրա խոսքերով՝ հնարավոր պատճառներից մեկն այն է, որ ամերիկացիներին շատ ավելի հեշտ է իրենք այդ ամենը պլանավորեն եւ իրականացնեն՝ իրենց հրամանատարությամբ, չլինելով նույնիսկ ձեւականորեն զսպված ինչ-որ նատօական կարգապահությամբ։ Թեեւ ԱՄՆ ուժերի հրամանատարը Եվրոպայում միաժամանակ ՆԱՏՕ-ի ուժերի հրամանատարն է Եվրոպայում։
«Ընդհանուր առմամբ, վարժանքներին կմասնակցի 40 000 մարդ։ Բնականաբար, մենք կարձագանքենք։ Եւ, բնականաբար, մենք կարձագանքենք այնպես, որ դա որեւէ անհարկի ռիսկեր չստեղծի։ Սակայն մենք չենք կարող անտեսել գործընթացները, որոնք շատ մեծ մտահոգություն են առաջացնում։ Մեր պատասխան միջոցառումներն անխուսափելի են»,- ամփոփել է Սերգեյ Լավրովը։