Ժամանակն է հրաժարվել ամեն կերպ ՀԴՄ տպագրելու մոլուցքից․ Սուրեն Պարսյան
Երկնիշ տնտեսական աճին հասնելու համար պետք են որոշակի հիմքեր, ամենակարևորը պետք են ներդրումներ։ Այս մասին այսօր՝ փետրվարի 4-ին, լրագրողների հետ հանդիպմանն ասաց տնտեսագետ Սուրեն Պարսյանը։
«Մենք չունենք խոշորածավալ ներդրումային նախագծեր կամ ակնկալիքներ, հետևաբար նման ցուցանիշի չենք կարող հասնել գոնե 2020 թվականի համար։ Բացի այդ նույն միջազգային կազմակերպությունների՝ ՀԲ-ի, ԱՄՀ-ի կանխատեսումներով՝ Հայաստանը կունենա 5-6 տոկոս տնտեսական աճ 2020 թվականի համար։ Սա վկայում է, որ նրանք նույնպես չեն տեսնում թռիչքաձև աճի հիմքերը։ Բացի այդ ինքնանպատակ երկնիշ տնտեսական աճ դնելը իմաստ չունի, քանի որ այդ աճը կարող են ապահովել շահումով խաղերը, որոնք տնտեսության համար որևէ էֆեկետ չապահովի։ Ներառական աճն այն չէ, որ պետությունը պետք է հնարավորություն տա բոլորին, ինչը կառավարությունը հայտարարում է, ներառական աճն այն է, որ այդ աճից պետք է կարողանան օգտվել բոլորը»,-նշեց նա։
Տնտեսագետը շեշտեց՝ վատ է, որ աճել են սուպերմարկետների մասնաբաժինը մանրածախ առևտրի շուկայում․
«2019 թվականին սուպերմարկետներն ավելացրել են իրենց մասնաբաժինը մանրածախ առևտրի շուկայում, այժմ տնօրինում են շուկայի 80 տոկոսը։ Սա վատ փաստ է և վկայում է, որ եկամուտները կուտակվում է մի քանի անձնանց ձեռքում։ Այս երևույթը կար և ավելի է խորանալու, քանի որ կառավարությունը որոշեց այս օլիգարխների շահութահարկը նվազեցնել 20 տոկոսից 18 տոկոս՝ այդ 2 տոկոսի բեռը դնելով հասարակության բոլոր խմբերի վրա։ Սա անարդար երևույթ է, որի դեմը պետք է օր առաջ առնել»։
Պարսյանը կարծում է՝ ժամանակն է հրաժարվել ամեն կերպ ՀԴՄ տպագրելու մոլուցքից․ «Մենք ֆետիշացրել ենք այդ երևույթը՝ չկարևորելով դրա բովանդակությունը։ Երբ կառավարությունը խոսում է միլիոնավոր ՀԴՄ կտրոնների ավելի տպագրելու մասին, պետք է հիշի նաև, որ 2019 թվականի ընթացքում 10 հաարից ավելի տնտեսվարողներ չեն ստացել իրենց նոր սերնդի ՀԴՄ-ները։ Հիմա այդ խնդիրը մեկ տարուց ավելի է՝ կա։ Երբ խոսում էին, որ նոր սերնդի ՀԴՄ-ներ մանավորը կբերի, մասնավորը չբերեց և տնտեսվարողները առանց ՀԴՄ-ների են գործում։ Հիմա թող կառավարությունը պատասխան տա, թե ինչու 1 տարի է՝ չեն կարողանում ապահովել նոր սերնդի ՀԴՄ-ներով, նոր խոսեն այն տպելու մասին»։