Կորոնավիրուսի դեմ պայքարը սպառնում է Apple-ին զրկել iPhone-ի արտադրության համար անհրաժեշտ մասերից

Միջազգային հանրության կողմից 2019-nCoV կորոնավիրուսի դեմ նախաձեռնվող պայքարի միջոցները սպառնում են ամերիկյան ընկերություններին զրկել iPhone սմարթֆոնների եւ ավտոմեքենաների պահեստամասերից, ինչպես նաեւ Ալցհեյմերի հիվանդության դեմ դեղամիջոցներից։ Այս մասին ասվում է The Washington Post թերթի առաջին էջում հրապարակված հոդվածում։

ԱՄՆ-ի եւ Եվրոպայի խոշորագույն ավիաընկերությունները երկու ամսով դադարեցնում են բեռնատար եւ ուղեւորատար չվերթները Չինաստան։ Հոդվածի հեղինակները ընդգծում են, որ այնպիսի ամերիկյան ընկերություններ, ինչպիսին են General Electric-ը, Caterpillar-ը, Chrysler-ը, General Motors-ը եւ Ford-ը, «կախված են նրանից, ինչը պատրաստվում է չինական գործարաններում»,- հայտնում է ՏԱՍՍ-ը։

Նրանք նշում են, որ ստեղծված իրավիճակում «կենցաղային էլեկտրոնիկա արտադրողները դասվում են առավել խոցելիների թվին, քանի որ շատ խաղային հավելվածներ, սմարթֆոններ եւ պլանշետներ արտադրվում են Չինաստանում»։ Թերթը հիշեցրել է, որ շաբաթ օրը Apple ընկերությունը հայտարարել է Չինաստանում իր բոլոր գրասենյակները եւ մեծածախ խանութները (որտեղ անցյալ տարի վաճառքի ծավալը կազմել է 44 մլրդ դոլար) մինչեւ փետրվարի 9-ը փակելու մասին։

«Աշխարհին չորս տասնամյակ ուժեղացված ինտեգրումից հետո Չինաստանը միանգանմից վերածվեց կղզու՝ տնտեսական առումով։ Նրա ժամանակավոր մեկուսացումը, ոչ ոք չգիտի՝ ինչ ժամկետով, կվնասի ընկերություններին, որոնք կախված են չինական նյութերից, ինչպես նաեւ նրանցից, ովքեր իրենց ապրանքը Չինաստանում են վաճառում»,- նշվում է հոդվածում։

Ամերիկյան խորհրդատվական McKinsey ընկերության տվյալներով՝ Չինաստանը արտահանման խոշորագույն ուղղություն է 33 երկրների համար եւ ներկրվող ապրանքների գլխավոր աղբյուր 65-ի համար, ներառյալ՝ ԱՄՆ-ը։ The Washington Post-ի կողմից հարցված փորձագետները եւ ընկերությունների ղեկավարները հայտարարում են, որ «չինական մատակարարներին փոխարինող գտնելը հեշտ չէ», միջինը դրա համար կարող է երկու տարի պահանջվել։ Բացի այդ, ինչպես կարծում են General Electric-ում, «գոյություն ունեն որոշակի նյութեր, որոնք չի կարելի հեշտությամբ ստանալ Չինաստանի սահմաններից դուրս»։ Այնուամենայնիվ, թերթի կողմից հարցվածները վստահ են, որ վնասը կսահմանափակվի։

Անցյալ շաբաթ ԱՄՀ տնօրեն Կրիստալինա Գեորգիեւան հայտարարել էր, որ շատ հնարավոր է համարում կորոնավիրուսի բռնկման ազդեցությունը համաշխարհային տնտեսության վրա տարվա առաջին եռամսյակում։ Իսկ ԱՄՆ Պահուստային համակարգի ղեկավար Ջերոմ Փաուելը նոր կորոնավիրուսի հետեւանքները ներառել է երկրի տնտեսական զարգացման հեռանկարների հարցում անորոշության գործոնների թվում։