Յուտայում սկսվել է խարդախության մեջ մեղադրվող Լեւոն Թերմենջյանի դատը
Ամերիկյան Յուտա նահանգում սկսվել է ԱՄՆ-ում խարդախության սխեմայի մեջ մասնակցության համար մեղադրվող Լեւոն Թերմենջյանի գործով դատական հետաքննությունը։
Լեւոն Թերմենջյանը, որը հայտնի է Լեւ Ասլան Դերմեն անունով, որպես մեղադրյալ է անցնում Washakie Renewable Energy LLC ընկերության սեփականատեր Ջեյկոբ Քինգսթոնի եւ ֆինանսական տնօրեն Իսայի Քինգսթոնի հետ։ Նրանք մեղադրվում են առեւտրային հաշվետվությունների կեղծման միջոցով ավելի քան 500 մլն դոլարի հարկային սուբսիդիաները վատնելու մեջ։
Իր խոսքում Դերմենի փաստաբան Մարկ Գերագոսը հայտարարել է, որ իր պաշտպանյալը պարզապես օգտագործվել է բազմակին Ջեյկոբ Քինգսթոնի կողմից, որն արդեն խոստովանել է իր մեղքը եւ փորձում է պատասխանատվությունը գցել Դերմենի վրա, հայտնում է Associated Press-ը։
Նրա խոսքերով՝ Քինգսթոնը մեծացել է «թունավոր միջավայրում», որտեղ նա սովորել է ստել եւ խարդախություն անել։ Քինգսթոնն օգտագործել է Դերմենի կապերը Թուրքիայում, որպեսզի չկիսի միլիոնները, որ նա հայթայթել է, հավելել է փաստաբանը։
Մարկ Գերագոսը, որը հայտնի է նրանով, որ ներկայացրել է շատ աստղերի, այդ թվում՝ Մայքլ Ջեքսոնին, հավելել է, որ Դերմենը հարգված գործարար է։
Սակայն դատախազությունը այլ կարծիքի է։ Ինչպես դատարանում հայտարարել է դատախազ Լեսլո Գոեմատը, Դերմենն է դրդել Քինգսթոններին օպերացիայի ընդլայնման, Թուրքիայի եւ Լյուքսեմբուրգի միջոցով դրամական փոխանցումների իրականացման եւ Իռլանդիայից ու Հնդկաստանից Պանամայով վառելիքի փոխադրման։ Նրա խոսքերով՝ Դերմենն է հուշել մնացածներին, որ պետք է փողերը լվանալ շքեղ մեքենաներ եւ տներ գնելով։ Դատախազները ատենակալներին ցույց են տվել Դերմենի եւ Քինգսթոնի լուսանկարները՝ արծաթագույն «Բուգատիի» եւ ոսկեգույն «Լամբորջինիի» ֆոնին։ Նույն երկու մեքենաները հայտնվել են Յուտայում բազմամիլիոնանոց տան լուսանկարում։ Այդ տունը, դատախազի բառերով, Դերմենը Քինգսթոնին օգնել է գնել խարդախության արդյունքում ստացած փողերով։
Դատախազը հավելել է, որ Դերմենը ամենուր թիկնապահներով, մասնավոր ինքնաթիռներով կամ զրահապատ ավտոմեքենաներով է գնացել։ Նա սերտ կապերի մեջ է կառավարության եւ ոստիկանության ներկայացուցիչների հետ, սակայն դատախազը չի բացահայտել նրանց անունները կամ գտնվելու վայրը։
Դատախազի խոսքերով՝ դատապարտյալը Լեւոն Թերմենջյան անունը փոխել է Լեւ Ասլան Դերմենի, քանի որ նա սիրում է առյուծներ, իսկ «ասլան» թուրքերենից թարգմանաբար «առյուծ» է։
Իր հերթին, Գերագոսը նշել է, որ Դերմենն իր անունը փոխել է, քանի որ կնոջ մահից հետո ծրագրում էր տեղափոխվել Թուրքիա եւ ուզում էր խուսափել հայերի դեմ ուղղված էթնիկ հետապնդումներից։
Նախկինում Դերմենը 10 կետերով, այդ թվում՝ փողերի լվացումը, ընդունել էր իր մեղքը։
Լուրեր Հայաստանից - NEWS.am