Իմքայլականների երազանքի Սահմանադրությունը
Վերջապես հայտնի դարձավ, թե ինչպիսին պետք է լինի Սահմանադրությունը իմքայլականների նախաձեռնած սահմանադրական փոփոխություններից հետո:
Հոդված 1. Հայաստանի Հանրապետությունն ինքնիշխան, ժողովրդավարական, սոցիալական, իրավական, հպարտ եւ դուխով քաղաքացիների պետություն է:
Հոդված 2. Հայաստանի Հանրապետությունում իշխանությունը պատկանում է ժողովրդի միակ կամարտահայտիչին՝ վարչապետին, որն էլ նշանակում է նախարարներին, փոխնախարարներին, ձեւավորում Ազգային ժողովը, տեղական ինքնակառավարման մարմինները, կրճատում եւ վերացնում ծննդատները:
Հոդված 3. Մարդը, նրա արժանապատվությունը, հիմնական իրավունքները եւ ազատությունները
Հայաստանի Հանրապետությունում մարդը միջոց է ժողովրդի ներկայացուցչին ծառայելու համար: Նրանք, ովքեր կհանդգնեն հիշել իրենց արժանապատվության, իրավունքների եւ ազատությունների մասին կպառկեցվեն ասֆալտին, կծեփվեն պատերին եւ կզրկվեն թաթիկներից:
Հոդված 4. Իշխանությունների բաժանման եւ հավասարակշռման սկզբունքը
Պետական իշխանությունն իրականացվում է ժողովրդի կամարտահայտիչի՝ վարչապետի կամոք եւ ցանկություններով: Սահմանադրությունը եւ օրենքները համապատասխանեցվում եւ մշտապես փոփոխվում են ըստ նրա ցանկության, կամքի եւ տրամադրության: Օրենսդիր, գործադիր եւ դատական իշխանությունների ղեկավարը ժողովրդի կամարտահայտիչ վարչապետն է, որն էլ ըստ օրվա տրամադրության լուծում է իշխանության տարբեր ճյուղերի բաժանման ու հավասարակշռման խնդիրը:
Հոդված 5. Իրավական նորմերի աստիճանակարգությունը
Ժողովրդի կամարտահատիչի՝ վարչապետի կամքն ու ցանկություններն ունեն բարձրագույն իրավաբանական ուժ:
Oրենքները պետք է համապատասխանեն ժողովրդի, նրա կամարտահայտիչի կամքին եւ ցանկություններին, իսկ ենթաօրենսդրական նորմատիվ իրավական ակտերը՝ սահմանադրական օրենքներին եւ օրենքներին, որոնք ամբողջոին արտահայտում են ժողովրդի կամքն ու ցանկությունները, նպատակներն ու կրում նրա դուխը:
Հայաստանի Հանրապետության վավերացրած միջազգային պայմանագրերի եւ օրենքների նորմերի միջեւ հակասության դեպքում կիրառվում են ժողովրդի կամարտահայտչի ցանկությունները եւ որոշումները: Անհրաժեշտության դեպքում միջազգային կառույցներն արժանանում են պախարակման ժողովրդի կամարտահայտչի կողմից:
Հոդված 6. Օրինականության սկզբունքը
Պետական եւ տեղական ինքնակառավարման մարմիններն ու պաշտոնատար անձինք իրավասու են կատարելու միայն այնպիսի գործողություններ, որոնց համար լիազորված են ժողովրդի, այլ կերպ ասած՝ վարչապետի կողմից:
Հոդված 7. Ընտրական իրավունքի սկզբունքները
Հայաստանում դուխով եւ հպարտ քաղաքացիներն ազատված են ընտրելու եւ ընտրվելու ծանր պարտականություններից: Այդ խնդիրը լուծում է ժողովրդի կամարտահայտիչը: Արդարության սկզբունքը պահպանելով ժողովրդի կամարտահայտիչի ներկայացուցիչներն ընտրյալներից ընտրում են գերընտրյալներին:
Հոդված 8. Գաղափարախոսական բազմակարծությունը եւ բազմակուսակցական համակարգը
Հայաստանի Հանրապետությունում երաշխավորվում են գաղափարախոսական բազմակարծությունը եւ բազմակուսակցական համակարգը, որն իրականացվում է վարչապետի ամենօրյա ֆեյսբուքյան լայվերի միջոցով:
Top-News.am
Հումորի բաժին