«Խաղն ավարտված է». Թրամփը Բոլթոնի մասնակցությամբ տեսանյութ է հրապարակել՝ մերկացնելով նախկին խորհրդականի «սուտը»
Միացյալ Նահանգների նախագահ Դոնալդ Թրամփն իր պաշտոնական թվիթերյան էջում հրապարակել է ազգային անվտանգության հարցերով նախկին խորհրդական Ջոն Բոլթոնի մասնակցությամբ տեսանյութ, որում վերջինս Թրամփի և Ուկրաինայի նախագահ Վլադիմիր Զելենսկիի միջև տեղի ունեցած աղմկահարույց հեռախոսազանգը «ջերմ և սրտանց» է բնորոշում:
Ինչպես նշում է dailymail.co.uk-ը, այս ամենը կարևոր է այն տեսանկյունից, որ Բոլթոնի հրատարակվելիք գիրքը սպառնում է է՛լ ավելի բարդացնել ԱՄՆ Կոնգրեսում Թրամփի պաշտոնանկության հարցով սկսված գործընթացը:
Ըստ քաջատեղյակ աղբյուրների՝ իր հուշագրություններում Թրամփի նախկին խորհրդականը պնդում է, որ ԱՄՆ նախագահն Ուկրաինային տրամադրվելիք ֆինանսական օգնությունն ուղղակիորեն կապում է իր քաղաքական մրցակից Ջո Բայդենի և նրա որդու՝ Հանթերի դեմ հետաքննության վերսկսման հետ (Ուկրաինայում Բայդենի և նրա որդու դեմ քննության վերսկսումը բացասաբար կանդրադառնար այս տարվա նախագահական ընտրություններին մասնակցել պատրաստվող Բայդենի վարկանիշի վրա, ինչը ձեռնտու է Թրամփին-Tert.am):
Մինչդեռ Թրամփի հրապարակած տեսանյութում այն ժամանակ դեռ պաշտոնավարող Բայդենն «Ազատություն» ռադիոկայանի եվրոպական ծառայության հետ զրույցում ասում է, որ «Թրամփը և նրա վարչակազմը կոռուպցիայի հետ կապ չունեն», և որ նրա հեռախոսազանգը նորընտիր Զելենսկիի հետ «ջերմ ու սրտանց» է եղել:
«Խաղն ավարտված է»,-տեսանյութին կից գրել է Թրամփը՝ ակնարկելով, որ Բոլթոնի նախկին հայտարարությունները բացառապես չեն համընկնում նրա հուշագրությունների հետ:
Թրամփի կարծիքով՝ Բոլթոնի հեղինակած գիրքը, որի դիմաց նա երկու միլիոն դոլար է ստացել, «զզվելի է և ոչ ճշմարիտ»:
Աղբյուրը հավելում է, որ Սպիտակ տան ազգային անվտանգության խորհուրդը չի կարող թույլ տալ գրքի հրատարակումը, քանի որ այն խիստ գաղտնի տեղեկություններ է պարունակում և չի կարող հրատարակվել ներկայիս բովանդակությամբ:
GAME OVER! pic.twitter.com/yvMa6bPqfy
— Donald J. Trump (@realDonaldTrump) January 29, 2020
Մինչդեռ Սենատի դեմոկրատ անդամները պահանջում են հարցաքննության կանչել նախկին պաշտոնյային՝ իր գրքում Ուկրաինայի վերաբերյալ հատվածների մասով հարցաքննելու համար:
Հիշեցնենք, որ ԱՄՆ-ի Կոնգրեսի Ներկայացուցիչների պալատը նախորդ տարի քվեարկել էր նախագահ Դոնալդ Թրամփի պաշտոնանկության օգտին՝ նրան մեղավոր ճանաչելով լիազորությունների չարաշահման և Կոնգրեսի աշխատանքի խոչընդոտման հարցերում: