Ռուստամ Բադասյանի տիկնոջ աշխատավայրերի հարցում իսկապես խախտում կա. Ռուբեն Մելիքյան
ՀՀ արդարադատության նախարար Ռուստամ Բադասյանը կոռուպցիայի դեմ պայքարի դրոշ է բարձրացրել, իսկ դա նշանակում է, որ պետք է այդ ուղղությամբ իր վարքագիծը լինի անբիծ: Նրա տիկնոջ՝ Տաթևիկ Սարգսյանի՝ ԱԺ փոխնախագահ Լենա Նազարյանի խորհրդականի պաշտոնն զբաղեցնելն ու միաժամանակ իրավաբանական ծառայություն մատուցող ընկերության հիմնումը կոռուպցիոն երևույթ է:
Այս մասին Tert.am-ի հետ զրույցում ասաց «Իրավական ուղի» ՀԿ համահիմնադիր, իրավապաշտպան Ռուբեն Մելիքյանը:
«Այստեղ շատ կարևոր է այն հանգամանքը, որ մենք գործ ունենք ոչ թե պարզապես բարձրաստիճան պաշտոնյայի հետ, այլ պաշտոնյայի, որը ասոցացվում է կոռուպցիայի դեմ պայքարի հետ և հանրային դաշտում իրեն դիրքավորում է որպես կոռուպցիայի դեմ պայքարի առաջամարտիկ: Եթե դու կոռուպցիայի դեմ պայքարի դրոշն ես բարձրացրել, դա նշանակում է, որ պետք է ոչ թե պարզապես համապատասխանես հակակոռուպցիոն վարքագծին, այլ պետք է այդ վարքագիծը լինի անբիծ: Բայց նրա տիկնոջ աշխատավայրերի հարցում իսկապես խախտում կա. դա արդեն քննարկումից վեր է, որովհետև օրենքով ուղիղ սահմանված է՝ ԱԺ-ի աշխատակիցը չի կարող կատարել այլ վճարովի աշխատանք, որն, առնվազն որոշակի ժամանակահատված, արդարադատության նախարարի տիկինը կատարել է: Խոսքը վերաբերում է մայիս- հուլիս ամիսներին»,- ասաց Մելիքյանը:
Մելիքյանն ընդգծեց, որ հետաքրքիր դիտարկումներ ունի նաև Փաստերի ստուգման հարթակի՝ հրապարակումում Ռուստամ Բադասյանի տիկնոջ այն պարզաբանման վերաբերյալ, թե չի հիշում ԱԺ-ում աշխատանքից ազատվելու վերաբերյալ դիմումի ժամկետը, չգիտի, թե երբ են ազատել իրեն ԱԺ-ում աշխատանքից. «Այստեղից էլ հաջորդ հետևությունն է գալիս, որը նույնպես հետաքրքիր է: Փաստորեն աշխատանքային գործունեության վերջին հատվածում այնպես է ստացվում կամ այնպես կարելի է մեկնաբանել, որ արդարադատության նախարարի տիկինը աշխատանքի չի ներկայացել և կարծես թե չի էլ հիշում կամ չգիտի, թե իրեն աշխատանքից երբ են ազատել և հետևողական չի եղել, այդ հարցը ուշադրության կենտրոնում չի պահել»,- ասաց Մելիքյանը:
Իրավապաշտպանը նշեց, որ այս հանգամանքներն այլ պայմաններում նույնպես կարևոր կլինեին, սակայն հույժ կարևոր չէր լինի, եթե խոսքը չվերաբերեր այն պաշտոնատար անձին, որն իրեն դիրքավորում է և հանրության առջև ներկայանում է որպես հակակոռուպցիոն քաղաքականության հիմանական գործող անձանցից մեկը.«Այդ պաշտոնյայի պարագայում մենք իսկապես գործ ունենք լուրջ խնդրի հետ և կարծում եմ՝ դրան պետք է նաև իրավական արձագանք տրվի»,- ասաց նա և հավելեց, որ պատասխանատվությունը կարող է լինել իրավական գործիքակազմով:
Հարցին՝ պատասխանատվությունը իրավակա՞ն, թե՞ քաղաքական հարթությունում է տեսնում, Ռուբեն Մելիքյանն ասաց.
«Քաղաքականն իր հերթին, բայց կան նաև իրավական գործիքակազմ, որոնք պետք է որոշակի հանգամանքներ ստուգման առարկա դարձնեն, և ես դրանից երկուսի մասին խոսեցի: Սա սկզբունքայնության և իրենց իսկ հանձնարարած գաղափարներին համապատասխան լինելու խնդիր է: Շատ հեշտ է թվում վերցնել ինչ-որ սկզբունք կամ գաղափար և դառնալ այդ գաղափարի դրոշակակիրը, դա հեշտ բան չէ և մեծ պատասխանատվություն է ենթադրում: Այստեղ մենք տեսում են, որ կարծես թե այդ պատասխանատվության բեռը չափազանց մեծ է եղել արդարադատության նախարարի համար»,- նշեց նա:
Ինչ վերաբերում է Ազգային հակակոռուպցիոն կենտրոնի այն պարզաբանմանը, որ Բադասյանի կինը Լենա Նազարյանի խորհրդական է նշանակվել առանց մրցույթի, Մելիքյանն ասաց, որ հստակ չգիտի՝ արդյոք մրցույթը պարտադի՞ր էր, թե՞ ոչ նման պաշտոն զբաղեցելու համար: Սակայն, ըստ նրա, այստեղ էլ կա կոռուպցիոն երույթ: «Այստեղ էլ գործ ունենք կոռուպցիոն երևույթի հետ, որն անուն ունի՝ «քրոնիզմ»: Դա նշանակում է պետական այն պաշտոնները, որոնք որ մրցութային ընթացակարգ չեն ենթադրում, շնորհվում են մտերիմներին՝ առանց հաշվի առնելու, թե ինչ այլ լավ կադրեր կարող են լինել: Այնպես որ դա «քրոնիզմ» է և կոռուպցիոն երևույթ է: Այս պարագայում այդ քաղաքական պատասխանատվությունը մեծ է, մենք գործ ունենք կոռուպցիոն երևույթի հետ»,- ասաց նա: