Ղազախստանում ուղևորատար ինքնաթիռ է կործանվել. կա 14 զոհ, 35 վիրավոր (լուսանկարներ)
Ալմաթիի օդանավակայանից թռիչքից հետո Bek Air ավիաընկերության ինքնաթիռը կորցրել է բարձրությունը և բախվել երկհարկանի շենքի: Դժբախտ պատահարի հետևանքով կան զոհեր, գրում է ria.ru-ն:
Ավելի ուշ Ալմաթիի քաղաքապետարանը հայտնել է, որ ինքնաթիռի կործանման զոհ է դարձել 14 մարդ, տուժել է 35-ը:
Z2100 չվերթը մեկնել է տեղական ժամանակով ժամը 7.22-ին: Նախնական տվյալներով՝ ինքնաթիռում եղել է 95 ուղևոր, անձնակազմի 5 անդամ: Ինքնաթիռի ընկնելուց հետո հրդեհ չի բռնկվել:
Ղազախստանի կառավարության ղեկավար Ասկար Մամինը կարգադրել է ստեղծել հատուկ հանձնաժողով, որի կազմում ընդգրկվել են փոխվարչապետը, մի շարք նախարարներ և պետական մարմինների ղեկավարներ: Դեպքի հանգամանքները պարզվում են:
Հաղորդվում է, որ վիրավորներից 8-ը երեխաներ են, մյուսները՝ մեծահասակներ. նրանցից 17-ը գտնվում են ծայրահեղ ծանր վիճակում:
