Ամուսնական զույգը 2 աղջիկ է որդեգրել և անսպասելիորեն 1.500.000 ռուբլու չափով պարտք ժառանգել
ՌԴ Սամարայի շրջանից ընտանեկան զույգը երկու աղջիկ է որդեգրել և անսպասելիորեն դարձել մոտ 1.5 միլիոն ռուբլու(խմբ.՝ մոտ 11.5 միլիոն դրամ) չափով հիփոթեքային պարտքի ժառանգորդ:
Ինչպես հաղորդում է Life.ru-ն, աղջիկների՝ Սաշայի և Նաստյայի կենսաբանական մայրն այս վարկատեսակով բնակարան էր ձեռք բերել դեռևս 2013-ին, սակայն վերջինիս մահից հետո բանկն իր գումարը պահանջել է քույրերի նոր ծնողներից:
Աղջիկների հարազատ մայրը մահացել է 2019-ի մարտի 30-ին, իսկ մեկ շաբաթ անց երեխաներն արդեն ծանոթացել են իրենց ապագա ծնողների՝ Ելենայի և Ալեքսանդրի հետ: Նրանք պատմում են, որ երեխաների հետ միանգամից մտերմացել են և սկսել որդեգրման գործընթացը, սակայն հիփոթեքային վարկի մասին իրենց ոչ ոք չի ասել:
Ըստ նրանց՝ իրենք տեղյակ են եղել, որ երեխաներն իրենց մորից ժառանգել են 1 սենյականոց բնակարան, որի կոմունալ վճարները ժամանակին չկատարելու պատճառով մոտ 50.000 ռուբլի պարտք էր գոյացել: Նոր ծնողները համաձայնել էին մարել այդ պարտքը, սակայն ավելի ուշ իմացել էին նաև մյուս բնակարանի գոյության մասին: Չնայած դրան՝ ամուսնական զույգը մտադիր չէ հրաժարվել քույրերի խնամքից:
Հաղորդվում է, որ վարկավորած կազմակերպությունը հաստատել է, որ մահացածի երեխաները ժառանգել են ոչ միայն իրենց հանգուցյալ մոր բնակարանները, այլև նրա պարտքերը: Բանկը վստահեցրել է, որ Ելենան իրավունք ունի հրաժարվել ժառանգությունից՝ ներկայացնելով համապատասխան փաստաթուղթ: Դրանից հետո վարկավորմամբ ձեռք բերված բնակարանն աճուրդի կհանվի, որից ստացված հասույթն էլ կուղղվի հիփոթեքի մարմանը: