Ընդդիմությունը ճիշտ էր, իշխանությունը՝ սխալ. կառավարությունն առաջարկում է ցեմենտի կլինկերի ներմուծման հարկ սահմանել և բարձրացնել տուրքը
Կառավարությունը կրկին առաջարկում է փոփոխել ցեմենտի ներկրման տուրքը, սակայն այս անգամ գործադիրն առաջարկում է բարձրացնել այն, ինչպես նաև տուրք սահմանել ներկրող ցեմենտի հումքի կամ կլինկերի համար:
Մոտ 6 ամիս առաջ ԱԺ-ն, դեմ գնալով ընդդիմության փաստարկներին, նվազեցրել էր ցեմենտ ներկրելու տուրքը, և տուրք չէր սահմանել կլինկերի համար, ինչպես պահանջել էր ընդդիմությունը:
Էկոմոնիկայի նախարարությունը դեկտեմբերի 17-ին Իրավական ակտերի հրապարակման միասնական կայքում հրապարակել է «Պետական տուրքի մասին» ՀՀ օրենքում փոփոխություն կատարելու մասին նախագիծը, որով նախատեսվում է ներմուծվող յուրաքանչյուր տոննա ցեմենտի և ցեմենտի բովախառնուրդի համար կիրառել համապատասխանաբար 18 հազար և 10 հազար դրամ դրույքաչափ, ինչը կապահովի տեղական արտադրողների համար հավասար մրցակցային դաշտ:
Նախագծի հիմնավորման մեջ ասվում է, որ Էկոնոմիկայի նախարարությունն ուսումնասիրել է ցեմենտի ներքին շուկայում 2019 թվականին տեղի ունեցած փոփոխությունները, քննարկել և հաշվի են առել շահագրգիռ կողմերի դիրքորոշումները:
Ըստ ուսումնասիրության՝ արտադրության ոլորտում գրանցվել է անկում. 2019 թվականի հունվար-հունիս ամիսներին Հայաստանում արտադրվել է 194.1 տոննա ցեմենտ, իսկ հուլիս- հոկտեմբեր ամիսներին` 190.2 տոննա ցեմենտ:
«2019 թվականի հունվար-հունիս ամիսներին կտրուկ աճել է և՛ ցեմենտի, և՛ կլինկերի ներմուծումը՝ արձանագրելով նախորդ տարվա նույն ժամանակահատվածի նկատմամբ 386.2% և 244.5% աճի տեմպ: Կլինկերն աճել է նաև հունիսից հետո ընկած ժամանակահատվածում, քանի որ պետական տուրքի կիրառումը չի տարածվել ներմուծվող կլինկերի վրա: Մասնավորապես` 2019 թվականի հուլիս-հոկտեմբեր ամիսներին նախորդ տարվա նույն ժամանակահատվածի նկատմամբ կլինկերի ներմուծման աճի տեմպը կազմել է 262.8%»,- նշված է նախագծում:
Ցեմենտ արտադրող տեղական ընկերություններում արտադրանքի ձևավորված միջին ինքնարժեքը կազմել է 36.2 հազար դրամ՝ «Արարատ ցեմենտ» գործարանում և 39.5 հազար դրամ՝ «Հրազդան ցեմենտում»:
Ներկայումս ցեմենտի հիմնական ներմուծումն իրականացվում է Իրանից: Ըստ Էկոմոնիկայի նախարարության հաշվարկների՝ Իրանից ներկրվող ցեմենտի ինքնարժեքը Երևանում կազմում է մոտ 18 հազար դրամ: Հարկ է նշել, որ Իրանից ներկրվող կլինկերի ինքնարժեքը նույնպես կազմում է նույնչափ, սակայն այդ ներկրված կլինկերից ստացվող ցեմենտի ինքնարժեքը կազմում է 26 հազար դրամ, քանի որ կլինկերից ստացվում է մոտ 15% ավել ցեմենտ, և կլինկերից ցեմենտի ստացումը պահանջում է մոտ 10 հազար դրամ լրացուցիչ ծախս:
«Տուրքի սահմանման արդյունքում հուլիսից որոշակի քանակով նվազեց ցեմենտի ներմուծումը Իրանից, սակայն կտրուկ աճեց կլինկերի ներմուծումը: Նշված տուրքը բավարար չէր ներքին շուկայում տեղական ցեմենտի մրցակցության ապահովման համար, քանի որ անգամ 14 հազար դրամ տուրք սահմանելու պարագայում իրանական ցեմենտի ինքնարժեքը կազմում էր 32 հազար դրամ, այն պարագայում, երբ տեղական ցեմենտի միջին ինքնարժեքը կազմում էր 37.5 հազար դրամ: Կլինկերի ներմուծման ծավալները նույնպես մրցակցությունից դուրս են թողնում տեղական արտադրանքը»,- գրված է նախագծում:
Հիշեցնենք, որ 2019 թվականի հունիսի 3-ին ՀՀ Ազգային ժողովը «Պետական տուրքի մասին» օրենքում փոփոխություններ կատարելու նախագծին, որով 14 հազար դրամ տուրք էր սահմանվել միայն ցեմենտի ներկրման համար: