Արմեն Աշոտյանը նոր երգ է գրել
Շաբաթ երեկոյան ՀՀԿ փոխնախագահ Արմեն Աշոտյանն իր ընկերոջ՝ պետգույքի կառավարման վարչության նախկին նախագահ Արման Սահակյանի հետ լուսանկար էր հրապարակել «Արդինի» ստուդիայից։
«Իսկ թե շաբաթ երեկոյան ինչ ենք անում ԱՐԴԻՆԻ ստուդիայում ես եւ Արման Սահակյանը, կիմանաք մինչեւ տարեվերջ»,-նկարին կից գրել էր Աշոտյանը։
Մենք պարզեցինք, որ Աշոտյանը նոր երգ է ձայնագրել «Արդինի» ստուդիայում։ Երգի պրոդյուսերն էլ Արման Սահակյանն է, ով վաղուց է զբաղվում երգահան Աշոտյանի պրոդյուսինգով։ Հիշեցնենք, որ Արմեն Աշոտյանը վաղուց է երգեր գրում ու բազմաթիվ հայտնի երգերի հեղինակ է, որոնք կատարել և կատարում են հայկական շոուբիզնեսի հայտնի դեմքեր՝ Հայկոն, Անչոկը, երջանկահիշատակ Վարդուհի Վարդանյանը։ Թե ինչ երգի մասին է խոսքը, Աշոտյանը չցանկացավ բացել փակագծերը՝ առաջարկելով սպասել մինչև տարվա վերջ, քանզի երգի պրեմիերան տեղի կունենա Նոր տարվա շեմին։ Առայժմ հայտնի չէ նաև, թե ով է կատարելու երգը։
Հարցին՝ կարո՞ղ է վարչապետի «հանձնարարած» ամանորյա նոր հիթային երգն է գրել, Արմեն Աշոտյանն ասաց․ «Քանի որ Նիկոլ Փաշինյանի երաժշտական ճաշակն էլ է ինձ համար խիստ կասկածելի, դրա համար կգերադասեմ նման տեսակի հայտարարություններին ընդհանրապես չանդրադառնամ։ Ինչ վերաբերում է Նիկոլ Փաշինյանի ցանկությամբ կամ խնդրանքով երգ գրելուն, եթե իր հրաժեշտի երգն ուզենա, որ ես գրեմ, կգրեմ»։