Իտալացի աջ ծայրահեղական ընդդիմադիր գործիչը հրաժարվել է Nutella-ից՝ իմանալով, որ այն թուրքական պնդուկ է պարունակում
Իտալիայի աջ ծայրահեղական ընդդիմադիր կուսակցության առաջնորդ, Իտալիայի ներքին գործերի նախկին նախարար, վարչապետի նախկին տեղակալ Մատեո Սալվինին հայտարարել է, որ այլևս չի հանդիսանում Nutella շոկոլադե կրեմի երկրպագու: Դա տեղի է ունեցել այն բանից հետո, երբ նա իմացել է, որ դրանք թուրքական պնդուկ են պարունակում: Այս մասին տեղեկացնում է independent.com կայքը:
Չնայած այն հանգամանքին, որ Սալվինին բավականին հաճախ է ազգային խոհանոցի նկարներով կիսվում և լուսանկարահանվում էսպրեսսոն ձեռքին, և իր կուսակցության կարգախոսն էլ «Առաջինն իտալացիներն» է, քաղաքական գործիչները դա համարում են նրա պոպուլիզմի մի մասը:
Ըստ նրա՝ այդ շոկոլադե կրեմն արտադրող Ferrero ընկերությունը պետք է կրեմի համար օգտագործի իտալական, այլ ոչ թե թուրքական պնդուկ:
«Ես պարզել եմ, որ Nutella-ն թուրքական պնդուկ է օգտագործում, և ես նախընտրում եմ օգնել այն ընկերություններին, որոնք օգտագործում են իտալական արտադրանք»,- ասել է նա իտալական Ռավեննա քաղաքում, երբ մի կին նրան սենդվիչ է առաջարկել:
Սակայն դժվար է ասել` արդյոք Իտալիան կկարողանա իր ռեսուրսներով բավարարել ընկերությանը, քանի որ Թուրքիան աշխարհում պնդուկի արտադրությամբ առաջատար երկիր է հանդիսանում, իսկ Ferrero ընկերությունն աշխարհում պնդուկի թիվ մեկ գնորդն է համարվում: 2015 թվականին այս ընկերությունը գնել է աշխարհում վաճառված պնդուկի 25%-ը:
Թուրքիայից հետո պնդուկի արտադրությամբ երկրորդ երկիրը հենց Իտալիան է, որն արտադրում է պնդուկի համաշխարհային պաշարի 20%-ը, իսկ առաջատար Թուրքիայի ցուցանիշը 70% է:
Սակայն հայտարարությունից հետո Սալվինին մեղմել է իր դիրքորոշումն այս հարցում՝ նշելով, որ ինքն ամեն դեպքում կուտի այդ արտադրանքը, միաժամանակ խնդրելով ընկերությանն օգտագործել իտալական արտադրանք: Այնուամենայնիվ, իր դիրքորոշումը նա մեղմել է այն բանից հետո, երբ իր սկզբնական հայտարարությունը ծիծաղի առարկա էր դարձել քաղաքական հակառակորդների կողմից, իսկ նախկին վարչապետ Մատեո Ռենցին նշել էր, որ Սալվինին, թողնելով պետական կարևորության գործերը, քննարկում է շոկոլադի հարցը: