Վերջին 10 տարին կարող է դառնալ դիտարկումների պատմության մեջ ամենատաքը
Օդերեւութաբանական համաշխարհային կազմակերպությունը (ՕՀԿ) կանխատեսում է, որ 2010-2019 թվականների ժամանակահատվածը, մեծ հավանականությամբ, կդառնա եղանակի եւ կլիմայի դիտարկումների պատմության մեջ ամենատաք տասնամյակը, իսկ 2019 թվականը կմտնի ամենատաք տարիների եռյակի մեջ: Այս մասին նշված է ՕՀԿ զեկույցում, որը երեքշաբթի հրապարակվել է Ժնեւում, փոխանցում է ՏԱՍՍ-ը:
Նշվում է, որ «հունվարից հոկտեմբեր գլոբալ միջին ջերմաստիճանը եղել է մինչարդյունաբերական մակարդակից (1850-1900) Ցելսիսուսի պլյուս-մինուս 0,1 աստիճանով բարձր»: Այս պատճառով, ինչպես սպասվում է, 2019 թվականը «կդառնա ամենատաք երկրորդ կամ երրորդ տարին»: Առայժմ այս իմաստով առաջնության դափնին պահպանում է 2016 թվականը: ՕՀԿ-ում «գրեթե վստահ» են, որ վերջին 5 տարում (2015-2019) եւ վերջին 10 տարում (2010-2019) միջին ջերմաստիճանները «համապատասխանաբար՝ կդառնան հայտնիներից ամենատաք հնգամյակը եւ ամենատաք տասնամյակը»:
Ինչ վերաբերում է 2019 թվականին, ապա այն կմտապահվի Արկտիկայի ընդարձակ շրջաններում բարձր ջերմաստիճանով: Սովորականից ավելի տաք է եղել նաեւ Հարավային Ամերիկայի, Եվրոպայի, Ասիայի, Աֆրիկայի եւ Օվկիանիայի մեծ մասում, միեւնույն ժամանակ ԱՄՆ տարածքի զգալի մասում նորմայից ավելի ցուրտ է եղել: Սեպտեմբերին Արկտիկայում ծովային սառույցի տարածականությունը եղել է դիտարկումների պատմության մեջ ամենափոքրերի ցուցակում երրորդը: Ինչ վերաբերում է Անտարկտիկայում ծովային սառույցի տարածականությանը, ապա մինչեւ 2016 թվականը այն դանդաղորեն աճել է, այնուհետեւ կտրուկ կրճատվել, եւ հիմա «համեմատաբար ցածր մակարդակում» է: 2018 թվականի սեպտեմբերից 2019-ի օգոստոս Գրենլանդիայում սառցե վահանը կորցրել է 329 գիգատոննա սառույց:
ՕՀԿ կանխատեսումները հիմնված են ընթացիկ տարվա հունվարից հոկտեմբեր եղանակի մասին տվյալների վրա: ՕՀԿ-ն նախատեսում է 2019 թվականին կլիմայի վիճակի մասին վերջնական եզրահանգումները ներկայացնել մարտին:
Կլիմայի փարիզյան համաձայնագիրը ձեռք է բերվել 2015 թվականի դեկտեմբերի 12-ին միջազգային գագաթնաժողովի արդյունքներով: Նրա մասնակիցները պայմանավորվել են 2100 թվականին մոլորակում Ցելսիուսի ավելի քան 2 աստիճանով միջին ջերմաստիճանի բարձրացում թույլ չտալ մինչարդյունաբերական դարաշրջանի ցուցանիշի համեմատությամբ: