Խայտառակելով Արա Վարդանյանին` խայտառակեցին նաև հիմնադրամի գաղափարախոսությունը
«Հեռուստամարաթոն 2019»-ի հանգանակությունն այսպիսի ցածր՝ 9.8 մլն դոլարի արդյունք գրանցեց կազմակերպչական հարցերի, Սփյուռքին չճանաչելու, «Իմ քայլը» հիմնադրամի և «Հայաստան» համահայկական հիմնադրամի նախկին տնօրեն Արա Վարդանյանի հետ կապված պատմության պատճառով: Այս մասին Tert.am-ի հետ զրույցում ասաց Ռամկավար-ազատական կուսակցության ատենապետ, «Ազգ» թերթի գլխավոր խմբագիր Հակոբ Ավետիքյանը՝ անդրադառնալով նրան, որ «Հայաստան» Համահայկական հիմնադրամի 22-րդ հեռուստամարաթոնի ընթացքում նվիրաբերվել է 9 մլն 856 հազար ԱՄՆ դոլար, ավելի քիչ, քան հավաքվել է վերջին տասը տարիներին։
«Արա Վարդանյանին հանցագործի դիրքով նկարելը, ցույց տալն ազդեցին Սփյուռքի վստահության վրա: Առանց մտածելու՝ նման բաներն ազդում են, այդպիսի գործողություններ էին կատարում, կարող էին ասել՝ անթույլատրելի բան ես արել, հրաժարական տուր, առանց մեղադրանքի հաստատման, խայտառակեցին` խայտառակելով նաև ամբողջ հիմնադրամի գաղափարախոսությունը: Սա ամենամեծ հարվածն էր, առանց այն էլ տարեցտարի հանգանակությունների գումարը նվազում է:
Նույնիսկ հոգ չեն տանում Սփյուռքին ճանաչել: Սփյուռքը փոխվել է, մոտեցումներ էլ պետք է փոխել, շատ լուրջ ուսումնասիրություններ կատարել: Նաև այլ խնդիր գոյություն ունի` զուգահեռ հանգանակությունները, որոնք կատարվում են արդեն մեկ տարուց ավել, ևս խանգարող հանգամանք են: Նկատի ունեմ «Իմ քայլը» հիմնադրամը, որն ստեղծվել է: Այն խաչաձևում է և շփոթ է ստեղծում»,-մանրամասնեց նա:
Հակոբ Ավետիքյանի խոսքով՝ պետք է ուսումնասիրել, թե այլ երկրներում ինչպես են իրականացնում հանգանակություններ և խոշոր գումարներ ներգրավում: Ըստ նրա՝ ամբողջությամբ պետք է փոխել մոտեցումները այս դրամահավաքի հարցում։
«Հետզհետե վերջին տասնամյակում խղճուկ արդյունքներ էինք գրանցում, հիմա այդ թրենդը շարունակվում է, հիմա դառնում ենք ազգովի էլ ավելի ծիծաղելի՝ նկատի ունենալով այն, որ անընդհատ խոսում ենք Սփյուռքից՝ հեռավոր, մոտ: Կազմակերպման տեսանկյունից ամբողջը սխալ է, հանգանակությունը պիտի այնպես լինի, որ ոչ թե կամավորական սկզբունքով լինի միայն, այլև դրանում բարի կամքի դրսևորմանը զուգընթաց պետք է պարտադրություն լինի»,– ասաց նա:
Հակոբ Ավետիքյանի խոսքով՝ վերջին տարիներին հանգանակության միջոցառման անցկացման վայրը նույնպես պետք էր փոխել։ «Մինչև հիմա Լոս Անջելեսում էին անում, 1-1,5 մլն էլ ծախսում էին այնտեղ, ընտրված տեղը սխալ էր, պետք էր անընդհատ փոխել, միշտ պետք է ուշադրություն դարձնել ԱՄՆ արևելյան շրջանին: Արևելյան ափի քաղաքներն ավանդաբար եղել են գլխավոր դոնորները համազգային հանգանակություններում, սկսած 1919 թվականից, երբ Զորավար Անդրանիկի գլխավորությամբ կազմակերպված Փրկության հանգանակության ընթացքում դեռևս շատ նոսր ամերիկահայությունը նվիրաբերեց շուրջ 600 հազար ԱՄՆ դոլար: Անշուշտ, նորագույն տեխնոլոգիաների և արդիական մեթոդների կիրառումը շատ ավելի արդյունավոր կարող է դարձնել մեր նմանօրինակ ձեռնարկումները»,- նշեց նա:
Ըստ նրա՝ կարող ենք դիտարկել նաև Իսրայելի փորձը: «Պետք է նվազագույնի հասցնել կառավարության ու պետական պաշտոնյաների դերակատարությունն այս գործում: Նրանց դերը պետք է սահմանափակվի ծրագիր-նախահաշիվ-կատարողական հաշվետվություն ներկայացնելու ծիրի մեջ: Վերահսկողները իրենք՝ հանգանակիչ մարմիները պիտի լինեն»,- ընդգծեց նա: