Ռուսաստանը Վաշինգտոնին խնդրել է չխառնվել երկրի ներքին գործերին
Վաշինգտոնում Ռուսաստանի դեսպանատունը պահանջել է, որ Միացյալ Նահանգները դադարի միջամտել երկրի ներքին գործերին: Այս մասին տեղեկացնում է Lenta.ru-ն` վկայակոչելով դիվանագիտական ներկայացուցչության հաղորդագրությունը:
Դիվանագետներն արձագանքել են ԱՄՆ պետքարտուղարության պաշտոնական ներկայացուցիչ Մորգան Օրտագուսի հայտարարությանը, որը Ռուսաստանի` օտարերկրյա գործակալների մասին օրենքը համարել էր «անկախ ձայները խեղդելու» միջոց:
Ռուսաստանի դեսպանատունը հիշատակել էր Մարիա Բուտինայի դեպքը, որից հետո «Ռուսաստանի ոչ մի քաղաքացի ԱՄՆ-ում չի կարող իրեն անվտանգ զգալ և ազատ խոսքի իրավունքից հաճույք ստանալ»:
Հիշեցնենք, որ Ռուսաստանի Դաշնության նախագահ Վլադիմիր Պուտինը լրատվամիջոցներին վերաբերող օրենք է ստորագրել օտարերկրյա գործակալի մասին: Ավելի վաղ օրենքը հավանության էր արժանացրել Դաշնային խորհուրդն ու Պետդուման:
Փաստաթղթի համաձայն՝ օտարերկրյա գործակալ կարող է դառնալ ցանկացած արտասահմանյան լրատվամիջոց, որը ֆինանսավորում է ստանում արտասահմանից: Միևնույն ժամանակ, որոշակի պարբերականներ կամ հեռուստաընկերություններ օրենքում չեն մատնանշվում: Արդարադատության նախարարությունն է որոշելու, թե ում ճանաչի որպես օտարերկրյա գործակալ: Այդ լրատվամիջոցներն ստիպված կլինեն հարկ եղածի պես կազմել իրենց նյութերն ու հաշվետվութուն ներկայացնել:
Հիշեցնենք, որ ռուս գործակալ Մարիա Բուտինան ձերբակալվել էր 2018 թվականին` ԱՄՆ-ում: Միացյալ Նահանգներում ազատազրկման 1,5 տարվա պատիժը կրելուց հետո նա Ռուսաստան է վերադարձել հոկտեմբերի 26-ին: Բուտինան մեղադրվել է Ամերիկայի ազգային հրաձգային ընկերակցությանն անդամակցելու միջոցով ԱՄՆ-ի պահպանողական ակտիվիստների շրջանում ռուսական գաղտնի ծառայությունների օգտին գաղափարական և կազմակերպական աշխատանք ծավալելու համար: