«Արսեն Թորոսյանի կողմից էմոցիոնալ պոռթկում էր»․ Լուսինե Բադալյան
Իմ խոսքերի կոնտեքստն այն էր, որ մենք էլի կառավարության քաղաքական հենարանն ենք, բայց եթե կառավարության բերած նախագիծը ինչ-որ խնդիրներ է ունենում, ապա մենք պարտավոր ենք այդ խնդիրների մասին բարձրաձայնել։ Այս մասին NEWS.am-ի հետ զրույցում ասաց ԱԺ «Իմ քայլը» խմբակցության պատգամավոր Լուսինե Բադալյանը՝ անդրադառնալով երեկ Ազգային ժողովի առողջապահության եւ սոցիալական հարցերի մշտական հանձնաժողովի նիստում՝ «Դեղերի մասին օրենքի» փոփոխության Առողջապահության նախարարության առաջարկի քննարկման ժամանակ իր խոսքերին։
Լուսինե Բադալյանը պնդեց՝ հանձնաժողովի նիստին հնչած քննադատությունը անձնավորված չէր և ուղղված չէր Արսեն Թորոսյանի դեմ․ «Ցանկացած մեկը, որ բերեր այդ նախագիծը, մենք պիտի հարցը բարձրացնեինք։ Անձնավորելը չգիտեմ որտեղից է գալիս և մի քիչ առողջ չի այդ մոտեցումը»։
Հարցին՝ Արսեն Թորոսյանի կողմից կոռուպցիայի հնարավորություն տեսնում եք, հատկապես երբ պատգամավոր Քրիստինե Պողոսյանը Արսեն Թորոսյանին հիշեցնում էր կոռուպցիայի մեջ մեղադրվող առողջապահության փոխնախարարին, Բադալյանն արձագանքեց․ «Արսեն Թորոսյանը, երբ նիստին ասում էր, թե Դուք ինձ եք մեղադրում կոռուպցիայի մեջ, Քրիստինե Պողոսյանն ընդդիմանում էր, ասում էր՝ Ձեզ չէ, բայց Դուք չեք կարող երաշխավորել, որ Ձեր ենթակաները կոռուպցիոն գործարքների մեջ չեն մտնի։ Իսկ երբ Արսեն Թորոսյանը շարունակեց պնդել, Քրիստինե Պողոսյանը հիշեցրեց մի քանի ամիս առաջ տեղի ունեցածը։ Երբ կոռուպցիոն ռիսկ կա, դա դեռ կոռուպցիայի մեջ մեղադրանք չէ»։
Լուսինե Բադալյանն ասաց, որ էլ ավելի թեժ քննարկումներ են եղել այս օրենքի նախագծի քննարկման ժամանակ․ «Այս նախագիծը քննարկվում է արդեն մեկ ամսից ավելի, մենք սրա վերաբերյալ ելույթներ ենք ունեցել լիագումար նիստին, ավելի թեժ քննարկում ենք ունեցել հանձնաժողովի նախորդ նիստին, երբ այս նախագիծն է քննարկվել, սա բավականին երկարատև գործընթաց է։ Մենք զգուշացրել էինք, որ եթե նախարարությունը չհանի այդ դրույթը, մենք դեմ ենք քվեարկելու։ Առողջապահության նախարարությունը մերժել էր և չէր եկել քննարկելու։ Այնպես չէ, որ մենք նախապես չենք ասել։ Մենք անընդհատ համագործակցություն ենք առաջարկել, երկար քննարկում է եղել, եթե այդ ամենը տեսնեիք, ձեր մոտ տպավորություն չէր լինի, թե մենք Արսեն Թորոսյանի դեմ ենք, հնարավոր է հակառակ տպավորությունը լիներ»։
Արսեն Թորոսյանի հայտարարությունը, թե կառավարության հենարան չլինելը լուրջ քաղաքական հետևանք է ունենալու, Լուսինե Բադալյանը էմոցիոնալ պոռթկում է համարում․ «Երեկ կրքերը թեժ էին և հաշվի առնելով Արսեն Թորոսյանի պոռթկուն բնավորությունը և մեր՝ կին պատգամավորների էմոցիոնալ վիճակը, դրանց որպես շատ լուրջ քաղաքական հայտարարություններ պետք չէ նայել, դա Արսեն Թորոսյանի կողմից էմոցիոնալ պոռթկում եմ համարում այդ արտահայտությունը։ Այդ պատճառով չեմ կարծում, որ պիտի ընկնեմ Թորոսյանի հայտարարությունից նեղանամ և ինչ-որ բաներ փնտրեմ դրա մեջ»։
Հարցին՝ բացի այս նախագծից, այլ անհամաձայնություններ ունեն, պատգամավորն ասաց․ «Անհամաձայնություններ շատ կան, միայն այս նախագիծը չէ, և դա նորմալ է, ես դա չեմ համարում անհամաձայնություն, կուզեի, որ դադարենք դա որպես թշնամանք դիտարկել, այլ թույլ տալ, որ կառուցողական քննարկումներ լինեն և ավելի նորմալ մթնոլորտում անցնեն, որովհետև երբ ասում եք իրար դեմ եք դուրս եկել, կողմերը սկսում են լարվել։ Անհամաձայնություններ եղել են որոշ բուժհաստատությունների մասանորեցմանը, հակածխախոտային օրենքի որոշ դրույթների մասով»։
Լուսինե Բադալյանը նաև նշեց, որ «Ֆեյսբուք» սոցիալական ցանցում չի վերականգնել իր էջը և առաջիկայում չի էլ պատրաստվում․ «Չէ, ես չեմ վերականգնվել, նույնսիկ չեմ էլ փորձել, չեմ պատրաստվում վերականգնվել այնքան ժամանակ, քանի դեռ հիմնական քննարկումները շարունակում են մնալ անառողջ և ուղղորդված, այսինքն եթե վերադառնանք այն ժամանակներին, երբ Ֆեյսբուքում տարբեր կարծիքներ էիր լսում, այդ ժամանակ սիրով կվերադառնամ, իսկ հիմա քանի դեռ անձնական վիրավորանքներ են, ոչ մի օգուտ չի տալիս, այսինքն չես տեսնում բուն թեմայի քննարկում, տեսնում ես վիրավորանք, ատելության խոսք, որի չափերն ահռելի են դարձել»։