Իջեւանում աննորմալ գործընթաց է սկսվել
Կառավարությունը որոշել է Իջեւանի եւ Իջեւանի նախկին շրջանի բնակավայրերի եւ բնակիչների նկատմամբ գիտափորձ իրականացնել: Իջեւանում, կարծես թե, վերականգնվում են սովետական կարգերը: Մեկ համայնքում միավորվում է քսան բնակավայր՝ ներառյալ Իջեւան քաղաքը:
Փաստորեն, մեկ համայնքի է վերածվում Իջեւանի նախկին շրջանը, բացառությամբ Դիլիջանի ենթաշրջանի: Իհարկե, ցանկացած որոշում կարելի է հիմնավորել հազար ու մի փաստարկով, բայց եթե խնդրին մոտենանք առանց հումորի, ապա այս որոշման աղետալի հետեւանքները հետո են երեւալու:
Դժվար է ասել, թե ում ինչ վատություն են արել սարիգյուղացիները, սեւքարեցիները, աչաջրեցիները, կիրանցեցիները, որ նրանց որոշեցին այսպես դաժանաբար պատժել:
Աչաջուրը Հայաստանի ամենամեծ գյուղերից մեկն է եւ նրան միավորել Իջեւանի հետ որեւէ տրամաբանության մեջ չի տեղավորվում: Չկա ոչ մի առողջ տրամաբանություն, որը կապացուցի, որ Աչաջուրը որպես համայնք պետք է վերանա: Նույնը վերաբերում է Սեւ Քարին, Խաշթառակին, Այգեհովիտին:
Կան նաեւ սահմանին գտնվող բնակավայրեր՝ Կիրանցը, Բերքաբերը, Վազաշենը, Աճարկուտը, որոնց պետք է ոչ թե միավորել այլ բնակավայրերին, այլ համայնքներին, այլ տալ հատուկ բնակավայրի կարգավիճակ:
Այս ամենը կառավարությանը չի հետաքրքրում: Նրանք ինչ-որ մեկին պատժում են ինչ-որ մեկին լավություն անելու համար:
Կառավարության ներկայացուցիչն էլ գործող համայնքների ղեկավարներին էլ ասել է, թե դուք ժողովուրդ չեք ներկայացնում, իսկ այ նոր համայնքապետը կներկայացնի ժողովրդին: Հեղափոխականները ավերում են այն ամենը, ինչը ստեղծվել է տարիների տաժանակիր աշխատանքով:
Որեւէ մեկը որեւէ խելամիտ բացատրություն չի տվել, թե ինչ է շահելու աչաջրեցին, երբ զրկվի համայնքի կարգավիճակից, ինչ են շահելու ազատամուտցին կամ կիրանցեցին:
«Բողոքեք, չբողոքեք, միեւնույնն է միավորելու ենք»,- գյուղապետերին ասել է Տարածքային կառավարման, տեղական ինքնակառավարման, գյուղատնտեսության եւ բնապահպանության հարցերի մշտական հանձնաժողովի նախագահ Վարազդատ Կարապետյանը: Անշուշտ, ողջունում ենք նրա ազնվությունը, բայց շատ ավելի լավ կլիներ, եթե նա հիմնավորեր, թե գյուղացին եւ իջեւանցին, բացի ապագա սուպերհամայնքապետից ինչ են շահելու այս տարօրինակ միավորումից:
Հիմա Իջեւանում, անգամ մարզպետարանում կատակում են, որ այսուհետ Տավուշի մարզպետն է ենթարկվելու եւ հաշվետու լինելու Իջեւանի սուպերհամայնքապետին:
Կարծես թե ամեն ինչ որոշված է, բայց դեռ իրենց խոսքը պետք է ասեն իջեւանցիները, այն գյուղերի բնակիչները, որոնց կարծիքի հետ հաշվի չնստելով անում են այս փոփոխությունները:
Հենց այնպես, առանց հետին մտքերի հիշեցնենք, որ սուպերհամայնքապետի իշխանությունների թեկնածուն Հայկ Ղալումյանն է՝ Նիկոլ Փաշինյանի ընտանիքի կնքահայրը: Եւ Իջեւանում համառ լուրեր են տարածվում, որ ուժային կառույցները մտերմիկ զրույցներ են ունենում բոլոր նրանց հետ, ովքեր կարող է համարձակվեն մրցակցության մեջ մտնել Ղալումյանի հետ:
Ի դեպ, արդեն գյուղերում իշխում է այն տրամադրությունը, որ եթե հանկարծ միավորումը տեղի ունենա, ապա ընտրությունների ժամանակ որեւէ գյուղացի ձայն չի տալու կառավարության աջակցությունն ունեցող թեկնածուին:
Վարդան Մխիթարյան
Top-News.am